Хуқуқбузарликларни олдини олишга қаратилган ҳамкорликдаги чора-тадбирлар кучайтирилди
Миллий гвардия ҳарбий хизматчилари жамоат жойларида, истироҳат боғлари, майдонлар, бозорлар ҳамда республика шаҳарлари ва бошқа аҳоли пунктлари кўчаларида ҳуқуқ-тартибот ва фуқаролар хавфсизлигини таъминлаш мақсадида патруль хизматини ўтказиш мобайнида спиртли ичимликлар истеъмол қилиш, тунда фуқароларнинг тинчлиги ва нормал дам олишини бузиш, майда безорилик, ҳуқуқни муҳофаза қилувчи органлар вакилларининг қонуний талабларига риоя қилмаслик каби ҳуқуқбузарликларни аниқладилар.
Хусусан, Тошкент вилояти Олмалиқ шаҳридаги “Ёшлар” истироҳат боғида 25 ёшли Е.Ж. қонунни ва ушбу боғда ҳордиқ чиқараётган болаларни назарга илмай, спиртли ичимлик истеъмол қилган. Мазкур ҳолат юзасидан фуқарога нисбатан Ўзбекистон Республикаси Маъмурий жавобгарлик тўғрисидаги кодекснинг 187-моддаси (“Жамоат жойларида алкоголь маҳсулотини истеъмол қилиш ”) билан ҳуқуқбузарлик тўғрисида баённома тузилди.
Шунингдек, А. Навоий номидаги истироҳат боғида спиртли ичимлик истеъмол қилган Навоий шаҳрида яшовчи 20 ёшли Д.Ш. ва Тошкент шаҳрида истиқомат қилувчи фуқаро Ю. Б га нисбатан Ботаника боғида “кучли” ичимлик истеъмол қилгани учун шу моддага асосан баённомалар расмийлаштирилди.
Фуқароларининг тунги вақтда дам олиш ҳуқуқига бепарво муносабатда бўлган шахсларга нисбатан чоралар кўрилмоқда.
Жумладан, пойтахтимизнинг Олмазор туманида 30 июль куни соат 23:40ларда Тошкент вилояти Зангиота туманида яшовчи 18 ёшли Т.Р. автомашинасини Фаробий кўчасидаги турар-жой биноси ёнига тўхтатиб баланд овозда мусиқа тинглаган.
Мирзо Улуғбек туманида соат 00.15 ларда “Уйғониш” маҳалла фуқаролар йиғинида Самарқанд вилояти Иштихон туманида яшовчи 23 ёшли Ғ.С. ҳам фуқароларнинг дам олиш ҳуқуқига бепарволик қилган ва автомобилда мусиқани баланд овозда тинглаган.
Навоий шаҳрида 19 ёшли Ҳ. М. ўзининг электромобилига эътибор қаратмоқчи бўлган ва бунинг учун вақт алламаҳал бўлганига қарамай ва турар-жойларда истиқомат қилувчи фуқароларни менсимай, карнайларни автомобил радиосига улаган ва мусиқани баланд овозда ёққан. Бу овоз эса фуқароларнинг дам олишига ҳалал берган.
“Баланд мусиқани севувчилар”га нисбатан Ўзбекистон Республикаси Маъмурий жавобгарлик тўғрисидаги кодексининг 192-моддаси (“Маиший шовқинга қарши кураш талабларини бузиш”)да назарда тутилган ҳуқуқбузарлик юзасидан маъмурий баённомалар тузилди.
Худди шу моддага кўра, ярим тунда баланд овозда гапирган, кулгиси билан фуқароларга дам олишга ҳалал берган шахсларга нисбатан маъмурий баённомалар тузилди.
Қарши шаҳрида 29 июлдан 30 июлга ўтар кечаси Миллий гвардия ҳарбийлари ички ишлар органлари ходимлари билан биргаликда бир вақтнинг ўзида бир нечта тартиб бузарларни аниқлашди.
Жумладан, 48 ёшли Б.Г. соат 3.24 да фуқароларнинг шовқин-суронни тўхтатиш ҳақидаги илтимосларига эътибор бермай, Ж.Д. билан баланд овозда гаплашган. Ҳар иккала ҳолат юзасидан Ўзбекистон Республикаси Маъмурий жавобгарлик тўғрисидаги кодексининг 192-моддаси (“Маиший шовқинга қарши кураш талабларини бузиш”)да назарда тутилган ҳуқуқбузарлик тўғрисида баённома тузилди.
Шунингдек, А. Навоий номидаги истироҳат боғида жанжал қилган Навоий шаҳрида яшовчи 32 ёшли М.Т.га нисбатан ҳам баённома тузилди.
