Ўзбекистон Республикаси Миллий гвардияси ҳарбий хизматчиларининг оилавий жамоалари ўртасида “Ибратли оила” кўрик-танловинининг саралаш босқичи республикамиз бўйлаб кўтаринки кайфиятда ташкил этилиб, куни кеча Самарқанд вилоятида саралаш жараёнларидан муваффақиятли ўтган жамоалар ўртасида мазкур танловнинг якуний босқичи бўлиб ўтди.
Вилоят Ёшлар маркази биносида юқори савияда ташкиллаштирилган республика босқичида жами 7 та оилавий жамоалар 3 та шарт асосида бор маҳоратларини синовдан ўтказишди.
Тадбирда Миллий гвардия Самарқанд вилояти бўйича бошқармаси бошлиғи полковник Л.Яхшиликов, Миллий гвардия Хотин-қизлар жамоатчилик кенгаши раиси ўринбосари подполковник Д.Худойберганова ҳамда Қўриқлаш бошқармаси ходимлари ҳарбий хизматчилар ва ота-оналар қатнашишди.
Тажрибали ҳакамлар томонидан жамоа аъзоларни: таништирув, саҳна кўриниши ва миллий анъаналар ва урф-одатларни кўргазмали намойиш этиш шартлари бўйича қилган тайёргарликларини баҳолаб борилди.
Республика босқичи оилавий жамоалар учун ҳақиқий ижодий майдонга айланиб, юқори савиядаги тайёрланган саҳна кўринишлари ва жонли ижро томошабинларда катта таассурот қолдиргани шубҳасиз.
Жамоаларнинг машаққатли меҳнати натижалари куннинг иккинчи қисмида Регистон ансамблининг "Шердор" мадрасасида очиқ осмон остида эълон қилинди.
Тантанали тақдирлаш маросим аввалида Миллий гвардия Самарқанд вилояти бўйича бошқармаси бошлиғи полковник Л.Яхшиликов сўзга чиқиб, барча кўрик-танлов иштирокчиларини чин қалбдан табриклади. Шунингдек, оила жамиятимизнинг асосий таянчи ва кўзгуси эканлиги таъкидланиб, ҳар бир оилани асраб - авайлаш орқали фарзандлар келажагини, юртимиз тинчлигини асраш мумкинлиги айтиб ўтилди.
Шундан сўнг, ғолиблар эълон қилиниб, натижаларга кўра: 3-ўрин Миллий гвардия Наманган вилояти бўйича бошқармаси ҳарбий хизматчиси Соатовлар оиласига, 2-ўрин Миллий гвардия Жиззах вилояти бўйича бошқармаси ҳарбий хизматчиси Дусмоновлар оиласига, фахрли 1-ўрин Миллий гвардия Тошкент шаҳар ҳарбий қисмларининг бирида хизмат қилаётган капитан Давлатовлар оиласига насиб этди.
Ғолибларга диплом ва қимматбаҳо эсдалик совғалари тақдим этилди.
Шунингдек, Миллий гвардия Хотин-қизлар жамоатчилик кенгаши раиси ўринбосарига ташаккурнома ва эсдалик совғаси топширилди.