ИМКОНИЯТИ ЧЕКЛАНГАН БОЛАЛАР ҲОЛИДАН ХАБАР ОЛИНДИ
Давлатимиз раҳбарининг ёшлар маънавиятини юксалтиришга қаратилган беш муҳим ташаббуси таълим-тарбия тизимини замонавий талаблар асосида ташкил этишда муҳим аҳамият касб этмоқда. Айниқса, ёшларнинг ўз истеъдод ва қобилиятларини намоён этишда, касб-ҳунар эгаллашларида, бўш вақтларини мазмунли ўтказишларида муҳим омил бўлмоқда.
Хусусан, Миллий гвардия Сурхондарё вилояти бўйича бошқармаси ҳарбий хизматчилари ҳамда Қўриқлаш бошқармаси ходимлари Шўрчи туманида жойлашган 122-сонли кар ва заиф эшитувчи болалар учун ихтисослаштирилган мактаб интернатига ташриф буюриб, муассасада беш ташаббус доирасида ўқувчи ёшларнинг пухта билим олишлари учун яратилган шарт-шароитлар ва имкониятлар билан яқиндан танишдилар. Мазкур мактабда бугунги кунда 400 нафардан ортиқ ўқувчилар таълим-тарбия олиб, ўғил-қизларнинг ҳар бирининг ўз дунёқараши, қизиқиши бор. Уларнинг имконияти чекланган бўлишига қарамай, имконияти чексиз тенгдошлари сингари китобхонликка, санъатга, спортга ҳамда компьютер саводхонлигини қунт билан қизиқиб ўрганишга иштиёқи баланд эканлиги қувонарли.
Миллий гвардия ходимлари томонидан ўқувчи ёшларга спорт анжомлари совға қилинди.
Ташриф давомида, мактаб маъмурияти билан ҳамкорликда мазкур даргоҳда турли маънавий-маърифий ҳамда спорт тадбирларини ўтказиш борасида келгуси режалар ҳақида келишиб олинди.
