Миллий гвардия инспектор-психологларининг ўқув-услубий йиғини ўз якунига етди
Миллий гвардия болалар билан ишлаш бўлимларининг инспектор-психологлари икки ҳафта давом этган ўқув-услубий йиғинларида қатнашишди. Йиғинларнинг мақсади давлатимиз Раҳбари томонидан ижтимоий соҳалардаги устувор вазифаларни муҳокама қилиш бўйича видеоселектор йиғилишида белгиланган топшириқ асосида умумтаълим мактабларига бириктирилган мутахассисларга касбий маҳорат ва янги лавозим вазифаларини ўзлаштиришда ёрдам беришдир.
Бир ҳафта давом этган биринчи босқичда инспектор-психологлар "Миллий гвардия тўғрисида" ги қонунни, интизомий низомни ва гвардия фаолиятини тартибга солувчи бошқа норматив-ҳуқуқий ҳужжатларни, шунингдек, инспектор-психологларнинг асосий функционал вазифалари ва фаолияти йўналишларини, бошқа манфаатдор вазирликлар ва ташкилотлар билан ўзаро муносабатлар тамойилларини ўрганишди.
Шу билан бирга, ўқув дастури бўйича ҳуқуқий фанлар курси, маънавият ва маърифат, алоқа, саф, жанговар ва ҳарбий муҳандислик тайёргарлигидан билимлар олишди.
Йиғиннинг иккинчи босқичи бутун республикамиз бўйлаб ўқув ҳарбий полигонларида ўтказилди. У ерда инспектор-психологлар билан махсус майдончаларда муҳандислик ва махсус тактик, ҳарбий-тиббий ва ўқ отиш бўйича тайёргарлик, жанговар машиналарни ҳайдаш бўйича машғулотлар бўлиб ўтди.
Шунингдек, ҳарбий хизматчилар ҳарбий топография асосларини, алоқа турларини ва уларнинг хусусиятларини, алоқани ўрнатишнинг мақсади ва умумий қоидаларини, алоқа воситаларининг тактик ва техник хусусиятларини амалиётда чуқур ўрганиб, анжом-аслаҳа билан узоқ масофага марш югуриш машқларида қатнашишди.
Ўқув йиғини давомида кун эрталаб жисмоний тайёргарлик, югуриш билан бошланади. Дарслар оралиғида инспектор-психологлар ўқув адабиётларини, ўтилган дарсларнинг конспектларини ўқиш, маиший-рўзғор эҳтиёжлари учун ташкил этилган чодир шаҳарчасида дам олиш имкониятларига эга бўлиб, шунингдек, дала ошхонаси, тиббиёт пунктлари ҳам мавжуд. Ҳарбий хизматчилар бўш вақтларини китоб ўқиш, кино томоша қилиш билан ўтказишди.
Шунингдек, мутахассис психологлар учун Миллий гвардия Маънавият ва маърифат маркази ансамбли хонандалари томонидан концертлар, музей ва театрларга ташрифлар, спорт тадбирлари ташкил этилди.
Ўқув-машғулот йиғини якунида соҳанинг масъул раҳбарлари томонидан кенгайтирилган йиғилиш ўтказилиб, унда ўқув машғулотлари якунлари сарҳисоб қилинди ҳамда касб маҳоратини янада ошириш бўйича вазифалар белгилаб олинди.