ИҚТИДОРЛИ ЁШЛАР ТАДБИРКОРЛАРГА БИРИКТИРИЛМОҚДА
“Ҳунарли киши хор бўлмас”, дейди халқимиз. Дарҳақиқат, давлатимиз томонидан интилувчан ёшларни касб-ҳунарга ўргатиш йўлида кенг имкониятлар ва шароитлар яратилиб берилмоқда. Чунки, устоз кўрган йигит-қизлар шогирдлик номига муносиб бўлишга ҳамда устозларининг кўмаги билан ҳаётда ўз ўрнини топишга интилади.
Шу мақсадда, Бухоро вилоятида Миллий гвардия масъуллари томонидан жойлардаги “Ёшлар дафтари”га киритилган ёшларни “Ҳар бир тадбиркор - ёшларга мададкор” тамойили асосида тадбиркорликка кенг жалб қилиниб, "Ёшлар: 1+1" дастури доирасида тадбиркорларга бириктириш борасида самарали ишлар олиб борилмоқда. Бу эса ишсиз ёшлар бандлигини таъминлашда муҳим ўрин тутмоқда.
Хусусан, ушбу тадбирлар орқали Бухоро шаҳридаги маҳаллаларга бириктирилган масъулларнинг уйма-уй юриб, ўрганишлари натижасида март ойининг ўзида 24 нафар ишсиз ёшлар аниқланиб, уларни тадбиркорларга бириктириш орқали бандлиги таъминланди. Шунингдек, ҳудудда тадбиркорлик фаолияти билан шуғулланувчи корхона ва ташкилотларга ташриф уюштирилиб, ишсиз ёшларнинг ота-оналарига фарзандларининг муносиб касб танлаши бўйича керакли маслаҳат ва тавсиялар берилмоқда.
