ЯНГИ ЎЗБЕКИСТОН – БАХТИЁР БОЛАЛАР МАМЛАКАТИ
Бугунги кунда мамлакатимизда Президентимиз ташаббуслари билан ҳар томонлама баркамол авлод тарбиясига юксак эътибор қаратилиб, кўплаб эзгу ишлар амалга оширилмоқда. 1 июнь – Халқаро болаларни ҳимоя қилиш куни ҳам бахтиёр болалар мамлакати бўлган Янги Ўзбекистонда ўзгача руҳ ва кўтаринки кайфиятда нишонланади. Навбатдаги лавҳамизда шу ҳақда сўз боради.
Ана шундай тадбирлардан бири Ўзбекистон Республикаси Миллий гвардияси ва Ўзбекистон касаба уюшмалари Федерацияси ҳамкорлигида пойтахтимиздаги Ўзбекистон касаба уюшмалари саройида ўтказилди. Ташкил этилган мазкур тантанали тадбирга Тошкент шаҳридаги 22- ва 30-Меҳрибонлик уйлари ҳамда SOS-Ўзбекистон болалар маҳаллалари филиалида тарбияланаётган болажонлар, Сирдарё, Тошкент шаҳри ва вилоятларидаги Оилавий уйлар ўғил-қизларидан иборат 500 нафар ёш авлод вакиллари таклиф этилди.
Болажонлар Миллий гвардия ҳарбий оркестри ва миллий мусиқа жамоалари ижросидаги куйлар садоси остида байрамона кутиб олинди.
Шундан сўнг болажонлар учун “Қалдирғоч” болалар санъат маркази ўқувчилари иштирокида Алишер Навоийнинг “Лисон ут тайр”, яъни “Қуш тили” достони асосида махсус саҳналаштирилган “Семурғ ҳақида афсона” номли мусиқали спектакль намойиш этилди.
Саҳналаштирилган мазкур спектакль орқали эзгуликнинг ёвузлик устидан доимо ғалаба қозониши тараннум этилди. Спектакль болажонларда унутилмас таассуротлар қолдирди.
Спектаклдан сўнг болажонлар Миллий гвардия Жамоат хавфсизлиги университетида бўлдилар. Ёш авлод вакиллари университет бўйлаб ташкил этилган саёҳат давомида ҳарбий оркестр, фахрий қоровул бўлинмасининг саф чиқишлари ва қўл жанги усулларини томоша қилишди. Шунингдек, ҳарбий техникалар ва қурол-аслаҳалар кўргазмаси ҳам намойиш этилди. Шундан сўнг улар байрам дастурхонига таклиф этилди.
Бундан ташқари болажонлар университети музейи ва кутубхонасида бўлишиб, ўзлари учун керакли бўлган маълумотларга эга бўлишди. Буларнинг барчаси болажонларда катта таассурот қолдирди.
