Тадбирларда ишчи гуруҳ томонидан вилоят аҳолисининг энергетика ва озиқ-овқат таъминоти, соғлиқни сақлаш, ижтимоий-маиший  муаммоларини аниқлаш ва бартараф этиш, ҳуқуқни муҳофаза қилиш ҳамда криминоген вазиятни янада барқарорлаштириш каби долзарб масалаларга  эътибор қаратилмоқда.

Шунингдек, тадбирлар чоғида вилоятнинг иқтисодий-ижтимоий объектлари ҳолати ҳамда аҳоли хонадонлари иссиқлик тизими ва тарқатилаётган кўмир ёқилғиси ҳам ўрганилмоқда.

Жумладан, бугун Миллий гвардия қўмондони бошчилигидаги ишчи гуруҳ Навоий вилоятининг Кармана туманидаги “Кўмир таъминот” МЧЖ Навоий вилоят филиалига қарашли Кармана кўмир омбори, “Иссиқлик электр станциялари” АЖнинг “Навоий Иссиклик электр станцияси” филиали, “Иссиқлик манбаи” ДУК Навоий филиалининг сув тозалаш иншооти ҳамда "Ҳудудгаз Навоий" газ тарқатиш филиали фаолияти билан тўлиқ танишди.

Шу билан бирга, ишчи гуруҳ томонидан туман ва маҳаллаларда аҳолининг мурожаатлари билан ишлаш ҳолати юзасидан “бешлик” билан  учрашилиб, фикр-мулоҳазалари тингланди.

Шундан сўнг, ишчи гуруҳ томонидан мавжуд муаммоли масалаларни тезкор бартараф этиш чоралари юзасидан вилоят ҳокими Н. Турсунов ва Миллий гвардия қўмондони Р.Джураев ҳамраислигида видеоселектор тарзида йиғилиш бўлиб ўтди.

Унда ишчи гуруҳ таркибида бўлган Ўзбекистон Республикаси Президенти Администрацияси, Ички ишлар вазирлиги, Адлия вазирлиги, Бош прокуратура ва унинг ҳузуридаги Департамент ҳамда Солиқ қўмитасининг раҳбар ва масъул ходимлари, шунингдек, вилоят сектор раҳбарлари, Миллий гвардия соҳавий хизматлари ва бошқа мутасадди идоралар вакиллари иштирок этди.

Йиғилишда вилоят аҳолиси муаммоларини ўрганиш ва уларни бартараф этишда белгилаб олинган 7 та асосий йўналишлар бўйича  4 та ишчи гуруҳ раҳбарлари олдида турган вазифалар ҳамда ҳамкорлик масалалари  муҳокама қилинди. 

Шундан сўнг, ташкил этилган тезкор штабда ишчи гуруҳлар томонидан ўрганиш давомида аниқланган тизимли муаммоларни таҳлил қилиш ва уларнинг ечими бўйича йўл харитаси ишлаб чиқиш юзасидан топшириқлар берилди.