Миллий гвардия қўмондони 22-сонли Тошкент “Меҳрибонлик” уйи тарбияланувчилари дам олаётган “Меҳрибон” болалар соғломлаштириш оромгоҳига ташриф буюрди
Миллий гвардия қўмондони генерал-майор Р. Джураев болалар билан суҳбатлашиб, ушбу оромгоҳда таътил кунлари қандай ўтаётгани, бу ерда улар мароқли ҳордиқ чиқаришлари учун қандай чора-тадбирлар амалга оширилаётгани билан қизиқди. Қўмондон оромгоҳ тарбиячилари ва ходимлари билан биргаликда ушбу оромгоҳда болалар учун яратилган шарт-шароитлар билан танишди.
Шу куни Миллий гвардия қошидаги Болалар психологияси маркази мутахассислари томонидан Камондан отиш Федерацияси ва “Paxtakor kids” болалар спорт мактаби иштирокида кўнгилочар тадбир ташкил этилди. Марказ мутахассислари психологик тренингларни ўйинлар - квестларга айлантирдилар, унда иштирок этиш болаларда ижодий қобилиятларни ва абстракт фикрлашни, ақлий ривожлантиришга ёрдам беради. Квестнинг спорт компоненти аниқлик, тезлик ва жамоавий руҳни ривожлантиришга имкон берди. Кун сўнгида Миллий гвардия ашула ва рақс ансамбли ҳамда “Меҳрибонлик” уйи тарбияланувчилари томонидан тайёрланган концерт дастури бўлиб ўтди.
Оромгоҳга Ўзбекистон Республикаси Президенти ҳузуридаги Ижтимоий ҳимоя миллий агентлиги мутахассислари Г. Носирова, Е. Лаврова, Н. Шерматов ва бошқалар ташриф буюришиб, яратилган шарт шароитлар билан танишди.
Ҳозирда 22-сонли "Меҳрибонлик" уйида 158 нафар бола тарбияланмоқда. Бугунги кунда қанча бола оилаларга топширилгани ҳақида батафсил бу ерда ўқишингиз мумкин.
