Шу каби манзилли тадбирлар пойтахтимизнинг Олмазор туманида бўлиб,  унда Миллий гвардия қўмондони Р.Джураев, туман ҳокими А.Умархонов ҳамда соҳага оид мутасадди раҳбарлар туман ҳудудидаги 24 ва 15-умумтаълим мактабларининг ўқитувчи ва мураббийлари, инспектор-психологлари ҳамда ҳудудий маҳалла раислари билан учрашишди.

Учрашув давомида юқори синф ўқувчиларининг дарслардаги давомати, тарбияси оғир ўқувчилар билан амалга оширилиши лозим бўлган чора-тадбирлар ҳамда ота-оналар ва маҳалла раисларининг бу борадаги масъулиятини ошириш борасидаги масалалар, шунингдек ота-онаси билан чет элга кетган ўқувчилар билан боғлиқ  ҳолатлар мухокама қилинди.

Ҳар иккала мактабда бўлиб ўтган учрашув давомида, Миллий гвардия қўмондони томонидан мактабдаги давомат билан боғлиқ муаммоли масалаларнинг сабаблари ва уларнинг ечими тўғрисида бир қатор мисоллар келтирилиб, эндиликда давомат билан ўқитувчилар шуғулланмаслиги, фақат сифатли дарс ўтиши лозимлиги, дарсга келмаганларни сабабини ўрганиш ва зарур чоралар кўриш ишлари мактабга бириктирилган Миллий гвардия ходими ва маҳалла раисининг ўзаро ҳамкорлигида амалга оширилиши  таъкидланди.

Бу борада Мактаб ва мактабгача таълим вазирлиги ҳамда Миллий гвардия ўртасида йўлга қўйилган ишончли ҳамкорлик  ўз самарисини беришни бошлагани алоҳида таъкидланди. Хусусан, жорий йилнинг 6-10 февраль кунлари мобайнида 24 ва 125-мактабларда электрон платформага киритилган давомат маълумотлари билан синфлардаги реал давомат ўртасида ҳеч қандай  тафовут  учрамаганлиги сабабли мактаб директорлари О.Зиева ҳамда Б.Мирҳолиқовларга Қўмондон буйруғи билан қимматбаҳо совға, қўл соатлари топширилди.

Шунингдек,  ўқувчиларни ватанпарварлик руҳида тарбиялаш орқали уларда “ҳуқуқбузарликка қарши иммунитет” ҳосил қилиш борасидаги масалалар ҳам мухокама қилинди. Бу борада туман ҳокими ва бошқа мутасадди раҳбарларнинг фикр-мулоҳазалари тингланиб, тумандаги барча мактабларда ватанпарварлик синфлари очилиши ва спорт тўгаракларни кенгайтириш бўйича аниқ вазифалар белгилаб олинди.