Мактаблардаги тарбия ва маънавият ҳамда ўқувчи-ёшларни ватанпарварлик руҳида тарбиялаш, шу билан бирга, таълим муассасаларидаги давомат масалалари юзасидан Давлатимиз Раҳбари томонидан белгилаб берилган устувор вазифаларнинг амалий ижроси таъминланиб, фаоллар муносиб рағбатлантирилмоқа
Айни кунларда республикамиз бўйлаб мазкур устувор вазифалар юзасидан масъул раҳбарлар бошчилигида амалга оширилаётган чора-тадбирлар ўзининг ижобий самарасини бераётганлигини ҳамда таълим тизимида янгича ёндашув билан фаолият олиб бораётган фидокор ва жонкуяр устозларнинг хизматлари муносиб рағбатлантирилаётганлигини алоҳида эътироф этиш лозим.
Хусусан, Миллий гвардия Сурхондарё вилояти бўйича бошқармаси бошлиғи Термиз шаҳрида жойлашган 1-сонли умумтаълим мактабида бўлиб, ўқитувчилар, инспектор-психолог ҳамда ҳудудий маҳалла раиси ва фаоллари билан учрашиб, яқиндан суҳбат ўтказди.
Унда мактаб ўқувчиларининг ўтган ҳафта давомидаги дарсдаги давоматлари таҳлил қилиниб, юқори синф ўқувчилари билан боғлиқ муаммоли масалалар ва уларнинг ечими борасидаги масалалар атрофлича муҳокама этилди. Учрашув доирасида ўқувчиларнинг давоматида ижобий ўзгаришлар кузатилаётган, “Мактаб – ота-она – маҳалла” тамойили асосида иш олиб борган, ўқувчиларни ватанпарварлик руҳида тарбиялашда ўзининг муносиб ҳиссасини қўшган бир гуруҳ ўқитувчилар эътироф этилди. Жумладан, 11-г синф раҳбари Олга Гладкова ҳамда 11-б синф раҳбари Гулзода Пардаеваларга бошқарма бошлиғининг ташаккурномаси топширилди.
Шунингдек, Урганч шаҳридаги 3-сон мактаб директори Раъно Абдуллаевна Ўзбекистон Республикаси Президентининг 2024-йил 5-февраль кунидаги “Вояга етмаганлар ўртасида қонунбузарликлар профилактикаси тизимини такомиллаштириш бўйича қўшимча чора-тадбирлар тўғрисида” ги қарори ижросини таъминлаш юзасидан мактабда олиб борилаётган ўқувчиларнинг давомат масалаларида ўзини яхши томондан кўрсатганлиги ҳамда шу билан бир қаторда, вояга етмаганлар ўртасида назоратсизлик ва қонунбузилишларининг олдини олишга муносиб ҳисса қўшаётганлиги учун Миллий гвардия Хоразм вилояти бўйича бошқармаси бошлиғининг Фахрий ёрлиғи ва эсдалик совғаси билан тақдирланди.
Шу билан бирга, Миллий гвардия Сирдарё вилояти бўйича бошқармаси ва Қўриқлаш бошқармалари томонидан ўрганишлар натижасига кўра ўқувчиларнинг билим олишлари, мактаб давомати ҳамда ёшларни ватанпарварлик руҳида тарбиялашга муносиб ҳисса қўшиб келаётганликлари учун Гулистон шаҳридаги 7-сонли умумтаълим мактаби директори Зафарова Наргиза Анваровна ҳамда 11-сонли умумтаълим мактаби директори Бектемиров Сирожиддин Рустамовичлар муносиб тақдирланди.
