МАЛАКА ВА БИЛИМ - МУСТАҲКАМ ПОЙДЕВОР
Пойтахтимизнинг криминоген вазияти мураккаб маҳаллаларида хизмат олиб бораётган ҳарбий хизматчилар учун Миллий гвардия Тошкент шаҳри бўйича бошқармаси маъмурий биносида бир ой мобайнида ўқув йиғини бўлиб ўтди.
Қизиқарли ва шу билан бирга муҳим бўлган машғулотлар ИИВ Академиясининг Жамоат тартиби ва хавфсизликни таъминлаш ҳамда Ҳуқуқбузарликлар профилактикаси кафедралари профессор-ўқитувчилари томонидан олиб борилди.
Миллий гвардиянинг жамоат тартибини сақлаш ва фуқаролар хавфсизлигини таъминлаш, ҳуқуқбузарликлар профилактикаси ва жиноятчиликка қарши курашиш фаолиятини самарали ташкил этиш, шунингдек вояга етмаганлар, уюшмаган ёшлар, профилактик ҳисобда турувчи ҳамда маъмурий назорат ўрнатилган шахслар билан ишлашда Миллий гвардия ҳамда ички ишлар органлари соҳавий хизматларининг ҳамкорлигини таъминлаш каби мавзуларни қамраб олган ўқув йиғини тизим ходимларининг касбий кўникмаларини мустаҳкамлашга хизмат қилди.
Бундан ташқари, машғулотлар давомида ҳуқуқни муҳофаза қилувчи органлар фаолиятида қўлланилаётган илғор ёндашувлар юзасидан ўзаро тажриба алмашилди.
Бу каби ўқув машғулотларнинг тизимли тарзда ташкил этилиши малакали кадрлар ҳамда юқори билим ва кўникмаларининг шаклланишида муҳим аҳамият касб этади.
