ҚАҲРАМОНЛАР ЁДИ МАНГУ БАРҲАЁТ
Сирдарё вилояти Сардоба қишлоғида техноген талофатни бартараф этиш вақтида Миллий Гвардия ҳарбий хизматчиси Суюнов Хазрат Караматович фидоийларча ҳалок бўлди. Унинг кўрсатган мардлиги ва жасурлиги юракларда мангу қолди.
Жорий йилнинг 5 май куни Хазрат Суюновнинг ўзи таълим олган Нурота тумани Чашма қишлоғидаги 10-сонли умумтаълим мактабида қаҳрамон йигит шарафига хотира кечаси ўтказилди.
Тадбирни Миллий гвардия Навоий вилояти бўйича бошқарма бошлиғи подполковник Б.Усмонов очиб берди. Шундан сўнг, сўзга чиққанлар марҳум ҳарбий хизматчининг хизмат бурчига содиқлиги, она ватанимиз ва халқимизга садоқати юракларда абадий қолишини, унинг хотирасини абадийлаштириш мақсадида ўзи таълим олган мактабда хотира бурчаги ташкил қилингани ҳамда келажакда мактабда бюсти ўрнатилиб, хотираси, қаҳрамонлиги, ватанпарварлигини акс эттирувчи ишларни ташкил қилиш ҳақида айтиб ўтишди.
Мактаб ҳовлисида ҳарбий хизматчиларнинг жанговар кўргазмали чиқишлари ва ўқувчи ёшларнинг ўқиган шеърлари кўнгилларни жумбушга келтирди. Шунингдек, марҳум руҳига ҳурмат бажо келтириш мақсадида бир дақиқа сукут сақланиб, олий фазилатлари ёдга олинди.
Тадбир сўнгида мактабда хотира бурчагини ташкиллаштиришда яқиндан ёрдам берган туман ҳокимлиги, халқ таълими бўлими ва мактаб маъмуриятига ташаккурномалар тақдим этилиб, шундай фарзандни вояга етказиб, таълим-тарбия берган қаҳрамон йигитнинг падари бузруквори Каромат Шириновга Миллий Гвардия раҳбарияти ўз миннатдорчилигини билдирди.
