"МЕНИНГ АРМИЯМ – МЕНИНГ ФАХРИМ!" ИЖОДИЙ ИШЛАР КЎРГАЗМАСИ
Ўзбекистон бадиий академияси марказий кўргазмалар залида Ўзбекистон Республикаси Қуролли Кучлари ташкил топганлигининг 31 йиллиги ҳамда "14-январь Ватан ҳимоячилари куни" муносабати билан "Менинг армиям – менинг фахрим!" мавзусидаги ижодий ишлар кўргазмаси иштирокчиларини тантанали тақдирлаш маросими бўлиб ўтди.
Ижодий ишлар профессионал ва ҳаваскорлар яъни таниқли рассом ва ижодкорлар, ҳарбий хизматчилар ва уларнинг оила аъзолари, талаба ва ўқувчи ёшлар орасида ўтказилди.
170 нафардан ортиқ иштирокчилар қатнашган ижодий ишлар танловида Миллий гвардия ҳарбий хизматчилари, ходимлари ва уларнинг фарзандлари ўзларининг 100 дан ортиқ асарлари билан фаол иштирок этишиб, турли йўналишларда ғолиб ва совриндор бўлишди. Ғолиб ва фаол қатнашган иштирокчиларга Миллий гвардия қўмондонининг диплом ва фахрий ёрлиқлари, ҳамда қимматбаҳо совғалар қўмондон ўринбосари полковник С.Мамаюсупов ва Ўзбекистон бадиий академияси раиси А.Нуриддинов томонидан топширилди.
Жумладан, Миллий гвардия Андижон вилояти бўйича бошқармаси ҳарбий хизматчиси лейтенант Давлатов Асилбек Шокиржон ўғлининг тақдим этган ижод намунаси фахрли 1-ўринни қўлга киритди. 2 ва 3 – ўринларга Жамоат хавфсизлиги университети ҳарбий хизматчиси кичик сержант Қаюмов Алишер Назиржон ўғли ҳамда Миллий гвардия Ихтисослаштирилган ўқув маркази ҳарбий хизматчиси Р.Баймуратовнинг қизи Баймуратова Эвелина Ринатовналар лойиқ деб топилди.
Шунингдек, Миллий гвардия Ихтисослаштирилган ўқув маркази ҳарбий хизматчилари полковник А.Бабаев ва полковник И.Ниязовларнинг фарзандлари Абдукаримова Шаҳноза Акмал қизи, Шуҳратова Азизахон Икром қизи ҳамда Миллий гвардия Тошкент шаҳар бўйича бошқармаси 81140 ҳарбий қисм ҳарбий хизматчиси 3-даражали сержант Ў.Зоҳидовнинг қизи Улуғбекова Зуҳра Ўткирбек қизларининг яратган асарлари комиссия аъзолари томонидан юқори баҳоланиб, уларга Миллий гвардия қўмондони фахрий ёрлиғи топширилди.
Шу билан бирга тадбирда Қуролли кучлар куч тузилмалари ҳарбий хизматчилари ва фахрийлари, ижодий уюшмалар вакиллари ҳамда зиёлилар иштирок этди. Ҳарбий ансамбл ашулачилари томонидан ватанни мадҳ этувчи куй қўшиқлар ижро этилиб, барчага байрамона кайфият бағишлади.
