Ўзбекистон Республикаси Миллий гвардияси ва Ўзбекистон Улоқ-кўпкари Федерацияси ўртасида меморандум имзоланди
Жорий йилнинг 7 июль куни Ўзбекистон Республикаси Миллий гвардияси ва Улоқ-кўпкари Федерацияси ўртасида ўзаро фаолиятларни қўллаб-қувватлаш ва ҳамкорлик алоқаларни йўлга қўйиш тўғрисидаги меморандум имзоланди.
Учрашувда Миллий гвардия қўмондони генерал-майор Р.Джураев ва Улоқ-кўпкари Федерацияси президенти Н.Джураевлар иштирок этиб, улар томонидан сўнгги йилларда давлатимизда Улоқ-кўпкари ўйинларига эътибор қаратилаётганлигига алоҳида урғу берилди. Шунингдек, ҳар бир вилоят марказида чавандозлар мактаби ва барча туманларда спорт секция ҳамда клублар фаолиятини йўлга қўйиш юзасидан тегишли масалалар муҳокама қилинди.
Суҳбат давомида жорий йилнинг март ойида Тошкент вилояти Пискент туманида Миллий гвардия қўмондони Кубоги учун ўтказилган улоқ-кўпкари мусобақаси эслаб ўтилиб, бу каби тадбирларни барча вилоятларда мавсумий ва доимий равишда ўтказилиши ҳамда унинг ташкилий масалалари юзасидан келишиб олинди.
Мазкур меморандум келгусида Миллий гвардия бўлинмаларида “Улоқ-кўпкари” спорт турини ривожлантириш, уюшмаган ёшларни ушбу спорт турига кенг жалб этиш, истеъдодли ёшларни саралаб олиш ва халқаро мусобақаларга тайёрлаш, шунингдек уларни келгусида Миллий гвардия сафларида хизмат қилишига замин яратишга қаратилган бўлиб, Ўзбекистон Республикаси Миллий гвардияси ва Ўзбекистон Улоқ-кўпкари Федерацияси ўртасидаги ҳамкорликни янги босқичга олиб чиқади.
Эслатиб ўтамиз, жорий йилнинг бугунги кунига қадар Ўзбекистон Республикаси Миллий гвардияси:
1. Ёшлар ишлари агентлиги, Миллий олимпия қўмитаси, Спорт курашлари ассоциацияси ҳамда Дзюдо федерацияси,
2. Халқаро қўл жанги федерацияси,
3. Ўзбекистон Джит-Кун-До Федерацияси,
4. Ўзбекистон замонавий бешкураш федерацияси ҳамда Ўзбекистон поло федерациялари билан ўзаро ҳамкорлик меморандумлари имзолаган.
