Миллий гвардия тизимидаги кичик командирлар иштирокида "Сержантлар форуми" бўлиб ўтди
Миллий гвардия тизимида юқори жанговар шайлик ва қатъий ҳарбий интизомга эга бўлган сержантларнинг ҳарбий маҳоратини, билим ва кўникмаларини ошириш мақсадида ҳар йили "Сержантлар форуми" ўтказилиши анъанага айланган.
Жорий йилнинг 23 февраль куни бўлиб ўтган навбатдаги Форум Миллий гвардия қўмондони генерал-майор Р.Джураев раҳбарлигида, қўмондон ўринбосари полковник С.Мамаюсупов ҳамда Ёшлар ишлар агентлиги бошқарма бошлиғи Ш.Олимовлар иштирокида видеоселектор тарзида ташкиллаштирилди. Унда Миллий гвардия таркибий ва ҳудудий бўлинмаларининг офицерлар ва сержантлар таркиби ҳам ZOOM платформаси орқали қатнашишди.
Миллий гвардия қўмондони ўзининг кириш сўзида Давлатимиз раҳбарининг сўнги йилларда ҳарбий хизматчиларга, хусусан, сержантларга бўлган юқори даражадаги эътиборини таъкидлаб, тизимда хизмат қилаётган сержант ва оддий аскарларни олий маълумотли офицер кадр сифатида етиштириш бўйича салмоқли ишлар олиб борилаётганлигини эътироф этди.
Шунингдек, Миллий гвардия тизимида сержантлар таркибини тайёргарлигига алоҳида эътибор қаратилаётганлиги ва ҳар қандай мураккаб вазиятларда жисмоний ҳамда руҳий синовларга бардош бера оладиган, ностандарт ҳолатларда мустақил қарор қабул қилиб, юклатилган вазифаларни аъло даражада бажаришга қодир бўлган кичик командирларни шакллантириш учун барча шароитлар мавжудлиги айтиб ўтилди.
Шу билан бир қаторда, айрим Кенгашлар ўзининг фаолиятини лозим даражада ташкил эта олмаганлиги боис, учраётган айрим салбий ҳолатлар танқидий таҳлил қилинди ва келгусида барча кичик командирлар ўзларига тегишли хулоса чиқариб, мавжуд камчиликларни бартараф этиш лозимлиги таъкидланди.
Тадбирда сўзга чиққан Ёшлар ишлар агентлиги бошқарма бошлиғи Ш.Олимов ушбу сержантлар форумида Миллий гвардия қўмондонининг шахсан иштирок этиб, ўз хизмат фаолиятидаги сержант(кичик командир)лик давридан мисоллар келтириб форум иштирокчиларига катта мотивация берганини юқори баҳолади.
Ноодатий тарзда бошланган тадбир очиқ мулоқот тарзида қизғин давом этди.
Маърузачилар замонавий техникалардан фойдаланган ҳолда, хизмат фаолияти давомида дуч келиш мумкин бўлган ҳолатлар ва уларда мустақил қарор қабул қилиш кўникмалари, спорт йўналишида жаҳон чемпионатлари ва бошқа халқаро ареналарда эришаётган ютуқлар, яратилаётган шарт-шароитлар тўғрисида фикр юритдилар.
Ҳарбий хизматдаги фаолиятларини ҳар томонлама рағбатлантириш, замонавий билим ва кўникмалар билан тажрибаларини ошириш ҳамда ижтимоий қўллаб-қувватлашни ўз ичига олган тадбир якунида бир қатор кичик командирлар Миллий гвардия қўмондонлиги томонидан муносиб рағбатлантирилди.
Тадбир сўнггида Миллий гвардия Маънавият ва маърифат маркази Ашула ва рақс ансамбли хонандаларининг куй ва қўшиқлари барчага юқори кайфият улашди.
