Миллий гвардия Фарғона вилояти бўйича бошқармасида 1-сонли ихтисослаштирилган мактаб интернати ўқувчилари учун "Очиқ эшиклар куни" бўлиб ўтди.
Юртимизда ёшларнинг бўш вақтларини мазмунли ўтказиш, уларда ватанпарварлик туйғуларини шакллантириш, жисмоний тарбия ва спортга кенг жалб этиш мақсадида Миллий гвардия Фарғона вилояти бўйича бошқармасида “Очиқ эшиклар куни” тадбири ташкил этилди. Тадбирда ҳарбий хизматчилар ва ўқувчи ёшлар иштирок этиб, ҳарбий қисмда яратилган шарт-шароитлар, ўқ отиш хонаси, маънавий тайёргарлик кўриш синфи билан яқиндан танишдилар.
Ёш бўлишларига қарамай, Ватанни қўриқлаш ва ҳимоя қилиш нақадар машаққатли ва шарафли иш эканлигини ҳис этган ўқувчилар ўзларини қизиқтирган барча саволларга батафсил жавоб олдилар.
Шунингдек, фаол иштирок этган ёшлар от миниб кўриш ва сайр қилиш имкониятини қўлга киритди.
Мана шундай маънавий-маърифий тадбирларнинг кўплаб ўтказилиши ва уларда ёшларнинг иштирок этиши, ўсиб келаётган ёш авлодни Ватан ҳимоясига бўлган қизиқиши ортиши ҳамда она Ватанга муҳаббат туйғуси билан улғайиб, комил инсонлар бўлиб етишишида аҳамиятлидир.
