Жорий йилнинг 5 май куни Урганч шаҳрида жойлашган Миллий гвардиянинг Хоразм вилояти бўйича бошқармаси ҳамда “Қўриқлаш” бошқармаси янги маъмурий биноларининг очилиш маросими бўлиб ўтди. Мазкур тантанали тадбирда Миллий гвардия қўмондони, генерал-майор Р.Джураев, Хоразм вилояти ҳокими Ж.Рахимов, вилоят сектор раҳбарлари, ҳамкор ташкилотлар мутасадди раҳбарлари, фахрийлар, ҳарбий хизматчи ва ходимлар ҳамда уларнинг оила аъзолари, Миллий гвардияга бириктирилган умумий ўрта таълим мактабларининг ватанпарварлик синфи ўқувчилари, шунингдек, Оилавий болалар уйлари фарзандлари  иштирок этишди. Миллий гвардия қўмондони ўз нутқида замонавий кўриниш касб этган ва янги имкониятларга эга бўлган мазкур бинолар ситуацион марказ, тезкор навбатчилик қисми, барча шароитларга эга бўлган хизмат  хоналари  ва ётоқхоналар, шунингдек, спорт мажмуалари ҳарбий хизматчи ва ходимларни касбга бўлган садоқатини янада юксалтиришга, билим ва кўникмаларини мустаҳкамлашга, спорт билан мунтазам шуғулланишлари ва маданий ҳордиқ чиқаришлари учун хизмат қилишини алоҳида таъкидлади. Вилоят ҳокими сўзга чиқиб, бугунги кунда Миллий гвардия ўз ўрнига эга эканлиги ва вилоятда ўтказилаётган барча тадбирларда жамоат тартибини сақлаш, фуқароларимиз ва хорижий меҳмонларимиз хавфсизлигини ишончли таъминлаб келаётганликларини фахр билан тилга олди.  Шу муносабат билан тизим ходимларига  халқимиз ишончи кундан-кунга ортиб бораётганлиги ва  юртбошимиз томонидан ҳам бир қатор масъулиятли вазифалар юкланаётганлигига  алоҳида урғу берди. Ушбу вазифаларни аъло даражада бажариб келаётган Миллий гвардия ходимларига катта ишонч билдириб, келгуси ишларига улкан зафарлар тилади. 

 Шундан сўнг Миллий гвардия қўмондони буйруғи ўқиб эшиттирилиб, унга кўра жамоат тартибини сақлаш, фуқаролар хавфсизлигини таъминлаш, жиноят ва ҳуқуқбузарликларнинг олдини олиш борасида фаоллик кўрсатиб, мустақил Ватанимиз қудрати ва салоҳиятини юксалтиришда ўзининг фидокорона хизматлари билан муносиб ҳисса қўшиб келаётган ҳарбий хизматчи ва ходимларга, самарали ҳамкорлик қилиб келаётган ташкилотлар вакилларига Миллий гвардиянинг I – II даражали "Намунали хизматлари учун", "Маънавият аълочиси" кўкрак нишонлари, Фахрий ёрлиқлар ва қимматбаҳо совғалар топширилди. Шуни алоҳида таъкидлаш жоизки тадбирга таклиф қилинган  Хоразм вилояти Соғлиқни сақлаш бошқармаси тасарруфидаги Болалар уйи бош шифокори Дзугаева Людмила Руслановна, Миллий гвардия қўмондонининг буйруғи билан,  ташаббускорлиги ва  ҳамкорликдаги  самарали меҳнатлари учун "Фидойи ходим" кўкрак нишони ва эсдалик қўл соати билан рағбатлантирилди. Анъанага кўра рамзий ленталар кесилган ҳолда янги бинолар эшиклари очилиб,  ташриф буюрган меҳмонларга Миллий гвардия ҳарбий хизматчи ва ходимлари  учун яратилган шарт-шароитлар  таништирилди.