Иқтидорли ёшлар ўртасида дамли ва зарбли чолғулар ижрочилиги бўйича “Санъат ғунчалари” ХХIV Республика кўрик-танлови ғолибларини тақдирлаш маросими бўлиб ўтди
Аввал хабар берганимиздек, жорий йилнинг 24 март кунидан Тошкент шаҳрида ёшлар ўртасида иқтидор эгаларини аниқлаш ва рағбатлантиришга қаратилган муҳим маданий тадбир старт олган эди. Болалар мусиқа ва санъат мактаблари ҳамда ихтисослаштирилган мусиқа академик лицейлари ўртасида ўтказилаётган ёш ижрочилар республика танловининг мақсади албатта, болаларга мусиқий таълим ва тарбия бериш масалаларига жамоатчилик эътиборини жалб қилиш, шунингдек, ёш иқтидорли созандаларни аниқлаш ҳамда чолғу ижрочилигининг энг яхши анъаналари давомчиларни тарбиялашдан иборатдир.
Маълумот учун: мазкур танлов Ўзбекистон Республикаси Президентининг 2022 йил 2 февралдаги “Маданият ва санъат соҳасини ривожлантиришга доир қўшича чора-тадбир тўғрисида”ги ПҚ–112-сон қарори, Ўзбекистон Республикаси Президентининг 2022 йил 16 февралдаги “Ўзбекистон Республикаси Миллий гвардияси Ҳарбий мусиқа академик лицейини ташкил этиш тўғрисида”ги ПҚ–129-сон қарорлари ижросини таъминлаш мақсадида ҳамда Ўзбекистон Республикаси Миллий гвардияси, Ўзбекистон Республикаси Маданият ва туризм вазирлиги, “Соғлом авлод учун” Халқаро хайрия фонди, Ўзбекистон композиторлари ва бастакорлари уюшмасининг қўшма қарорига асосан ўтказилиб келинмоқда.
“Санъат-ғунчалари” танловида 14000 дан зиёд иштирокчилар қатнашиб, 1600 нафари турли номинацияларда лауреат бўлишди.
Мусиқий танловда ижодкорлар 3 йўналишда : ёғоч-дамли, мис-дамли ва зарбли асбоблар, кичик ва катта гуруҳ номинациялари бўйича ўз имкониятларини синовдан ўтказишди.
Ёш иштирокчиларнинг ижодий маҳорати ҳар бир йўналиш бўйича ҳакамлар ҳайъати томонидан одилона баҳоланиб борилди.
Тантанали ёпилиш ва тақдирлаш маросими жорий йилнинг 27 март куни Ўзбекистон давлат консерваториясининг мусиқий залида ўтказилиб, унда ғолиб ва совриндорлар билан бир қаторда устозлар ва жўрнавозлар ҳам муносиб рағбатлантирилди.
