Миллий гвардия Чавандозлар мактаби мутахассислари учун от спортининг поло тури бўйича ўқув-йиғини ўтказилди
Ўзбекистон Республикаси Жамоат хавфсизлиги университетида от спортининг поло тури бўйича Миллий гвардия Чавандозлар мактабларининг мутахассислари иштирокида ўқув-йиғини бўлиб ўтмоқда.
Ўқув-йиғини семинарининг очилиш маросимида Миллий гвардия қўмондони ўринбосари полковник С. Мамаюсупов ва Жамоат хавфсизлиги университети бошлиғи полковник М. Рустамбаевлар иштирок этди. Раҳбарлар мазкур ўқув- йиғини семинарининг аҳамияти ҳақида сўз юритиб, жойларда чавандозлар мактабларига ёшларни кенг миқёсда қамраб олиш ва от спортининг поло турини оммалаштириш бўйича ўз тавсияларини беришди.
Шундан сўнг, мутахассислар ўз маърузалари билан ўқув машғулотларини давом эттирди. Мазкур ўқув -йиғини нафақат назарий тарзда балки университет базасидаги от спорти манежининг очиқ майдонида амалий тарзда олиб борилди. Йиғин давомида Жамоат хавфсизлиги университети доценти Н. Расулованинг "Чавгон миллий от спорти тарихи", Ўзбекистон Поло федерацияси вакили С. Джалоловнинг "От спортининг поло йўналишидаги халқаро қоидалар ва методика" ва "От спортининг поло йўналишидаги халқаро қоидалар ва методика – аренада" мавзуларидаги назарий ва амалий машғулотлари бўлиб ўтди.
Ўқув-йиғини якунлари бўйича Миллий гвардия Чавандозлар мактабларининг мутахассисларига семинарда фаол иштирок этганлиги учун ташаккурномалар топширилди.
