Миллий гвардия тизимларида муддатли ҳарбий хизматни ўташга бел боғлаган ёш аскарлар Ватанга қасамёд қилишди. Шу муносабат билан республикамиз бўйлаб тантанали маросимлар бўлиб ўтди.
“Ватанга қасамёд” юртимиз тинчлиги ва осойишталигини ҳимоя қилишдек муқаддас бурчни адо этишга бел боғлаган ҳар бир юртимиз мард ўғлонларининг тантанали ваъдаси, шунингдек Ватан ҳимояси йўлидаги масъулиятли ва шарафли вазифани ўзида мужассам этган ҳуқуқий ҳужжат бўлиб, Қуролли Кучлар сафига кирган ёш ҳарбий хизматчининг ҳаётидаги унутилмас кун ва тантанали ваъдаси ҳисобланади.
Шу кунларда Республикамиз бўйлаб Миллий гвардия ҳарбий қисм ва муассасаларига 2025 йилда чақирилган ёш аскарларни Ватанга қасамёд қилиш маросимларига бағишланган тантанали тадбирлар бўлиб ўтмоқда.
Хусусан, Тошкент шаҳри, Қорақалпоғистон Республикаси ва барча вилоятларда бўлиб ўтган тадбирларда ёш аскарлар қасамёдда битилган муқаддас сўзларни тилга олиб, Ўзбекистон халқига ва Президентига садоқатли бўлишга, Ўзбекистон Республикаси Конституцияси талабларини сўзсиз ва виждонан бажаришга, халқ ва давлат манфаатларини ҳимоя қилишга тантанали равишда ваъда бердилар. Тадбирда иштирок этган ҳар бир ёш аскарга Президент совғаси, китоблар жамланмаси тантанали равишда топширилди.
Тошкент шаҳрида бўлиб ўтган шу каби тантанали тадбирда Ўзбекистон Республикаси Миллий гвардияси қўмондони генерал-майор Р.Джураев, Олий Мажлис Қонунчилик палатаси депутати – Мудофаа ва хавфсизлик масалалари қўмитаси аъзоси К.Тожиев, Ўзбекистон Республикаси Президенти ҳузуридаги Хавфсизлик Кенгаши вакили Д.Джалалов, Нуроний жамғармаси Республика бошқаруви раиси ўринбосари Ш.Усмонов, Ўзбекситон Республикаси Ҳарбий прокурори в.в.б полковник О.Холбоев, Республика Ҳарбий суди раиси С.Эшанкулов, Ўзбекистонда хизмат кўрсатган артист Т.Саидов, ҳарбий хизматчилар ва фахрийлар, жамоатчилик вакиллари, ота-оналар ҳамда ўқувчи ёшлар иштирок этишди.
Тадбирда Миллий гвардия қўмондони, Ватанга қасамёд қилган барча ёш аскарларни ҳамда уларнинг яқинларини самимий муборакбод этди.
Шунингдек, тантанали тадбирда сўзга чиққанлар, юртимиз тинчилиги ва халқимиз осойишталигини таъминлашдек шарафли ва масъулиятли вазифаларни ўзининг энг олий бурчи деб билган мард ўғлонларимизга катта ишонч билдириб, муддатли ҳарбий хизмат давомида уларга омад ва улкан зафарлар тилашди.
Ҳарбий хизматда кўникма ҳосил қилган ёш аскарлар томонидан қисқа вақт давомида ўзлаштирилган қурол билан саф тайёргарлиги ва қўл жанги усулларидан кўргазмали чиқишлар ҳамда Фахрий қоровул бўлинмасининг саф чиқишлари намойиш этилди. Бир ойда фарзандларидаги ўзгаришларни кўрган ота-оналарнинг қалбида ғурур, фахр ва ифтихор туйғулари жўш урди.
Тадбирнинг бадиий қисмида ҳарбий оркестр ижросидаги мусиқали чиқишлар ва Миллий гвардия ансамбли санъаткорларининг Ватанни мадҳ этувчи куй-қўшиқлари иштирокчиларга кўтаринки кайфият улашди.
