Миллий гвардиянинг 85 нафар ҳарбий хизматчиси алвон берет кийиш ҳуқуқини берувчи синовлардан муваффақиятли ўтди.
Алвон берет кийиш ҳуқуқи учун саралаш синовларида 300 дан ортиқ даъвогарлар қатнашди.
Номзодлар ўзига хос жасорат тимсолини кийиб юриш ҳуқуқини қўлга киритиш учун бир қатор машаққатли синовлардан ўтишди. Жумладан, нафақат жисмоний куч ва чидамлилик, балки ҳарбий фанлар бўйича чуқур билимларни намойиш этиб, руҳий барқарорлигини исботлашди.
Алоҳида таъкидлаш жоизки, алвон берет кийиш учун саралаш синовларидан муваффақиятли ўтган номзодларнинг жанговар, жисмоний, ўт очиш ва бошқа турдаги ҳарбий тайёргарликлари ҳакамлар томонидан юқори баҳоланиб борилди.
Саралаш синовлари жисмоний, ўт ўчириш ва тоғ баландлиги тайёргарлиги машқларини ўз ичига олган. Унда номзодлар мазкур машқлар стандартларини бажариб, ҳарбий муҳандислик, оммавий қирғин қуролларидан ҳимояланиш ва бошқа бир қатор ҳарбий фанлардан талаб қилинадиган билим ва кўникмаларни намойиш этишди.
Шундан сўнг, жанг санъатининг назарий асослари ҳақидаги билимлар имтиҳондан ўтказилди ҳамда якуний босқичда номзодлар махсус кийим-бош билан ҳимояланган ҳолда 10-12 кмга юриб, турли тўсиқларни, шу жумладан сув тўсиғини енгиб ўтишди ва 4 та жанговар босқичда ўз имкониятларини синашди.
Малака синовларидан муваффақиятли ўтиб, алвон берет кийиш ҳуқуқини қўлга киритган барча сафдошларимизни самимий қутлаймиз!
