Миллий гвардия Маънавият ва маърифат марказида, “4 август Ўзбекистон Республикаси Миллий гвардияси ташкил топган кун!” муносабати билан тантанали тадбир ташкил этилди
Тадбир, Миллий гвардия қўмондони генерал-майор Р.Джураев бошчилигида бўлиб ўтди ва унда Ўзбекистон Республикаси Бош прокуратураси, хусусан, Ҳарбий прокуратура, Қуролли Кучлар вазирлик ва идоралари, Ҳарбий суд, ҳуқуқни муҳофаза қилувчи органларлар ва Ёшлар агентлиги мутасадди раҳбарлари, шунингдек тизим фахрийлари, хизмат вақтида ҳалок бўлган ҳарбий хизматчи ва ходимларнинг оила аъзолари ҳамда соҳа вакиллари иштирок этишди.
Миллий гвардия қўмондони кириш сўзида Муҳтарам Президентимиз Қуролли Кучлар Олий Бош Қўмондони Шавкат Миромонович Мирзиёев бошчилигида амалга оширилаётган туб ислоҳотлар натижасида Қуролли кучларимиз мамлакатимиз тараққиёти, тинчлиги ва барқарорлигининг ишончли кафолатига, чинакам жасорат ва матонат мактабига айланганлигини таъкидлаб ўтди.
Ислоҳотлар жараёнида бундан етти йил олдин, Давлатимиз раҳбарининг ташаббуслари билан Ўзбекистон Республикаси Қуролли Кучлари қўшинларининг жамоат хавфсизлигини таъминлаш ва ҳуқуқбузарликлар профилактикаси соҳасидаги вазифаларга эга бўлган махсус тури сифатида Ўзбекистон Республикаси Миллий гвардияси ташкил этилганлиги ва 2020 йил 18 ноябрдаги “Миллий гвардия тўғрисида”ги Қонуннинг қабул қилиниши тизим фаолиятини сифат жиҳатдан янги босқичга олиб чиққанига алоҳида урғу бериб, шу кунга қадар амалга оширилган ишлар тўғрисида тўхталиб ўтди.
Миллий гвардия шахсий таркиби Мудофаа, Ички ишлар, Фавқулотда вазиятлар вазирликлари, Давлат хавфсизлиги хизмати, Прокуратура органлари ва бошқа вазирликлар ва ташкилотлар билан хамкорликда аҳоли тинчлиги ва осойишталигини сақлаш, фуқароларнинг қонуний манфаатларини ишончли ҳимоя қилиб, айниқса, халқимиз учун синовли кунларда фидойилик кўрсатиб келаётганликларини ва бундан кейин ҳам “Бурч, Садоқат, Жасорат” шиори остида ўз бурчларига садоқатини намоён этишларига ишонч билдирди.
Сўзга чиққанлар ҳам Миллий гвардия томонидан қисқа фурсатда эришилган ютуқлар, жамоат хавфсизлигини таъминлаш, ҳуқуқбузарликлар профилактикаси ва бошқа тегишли соҳаларда амалга оширилаётган ишлар хусусида эътироф этиб ўтишди.
Шундан сўнг, Муҳтарам Президентимизнинг “Янги Ўзбекистонни барпо этиш йўлида эришаётган барча ютуқ ва марраларимизда Қуролли Кучларимиз ва уларнинг сафларида ўз вазифасини сидқидилдан адо этаётган минг-минглаб ҳарбийларимизнинг муносиб ҳиссаси бор” деган эътирофлари барчамиз учун юксак шараф эканлиги таъкидланиб, Миллий гвардия қўмондони, шунингдек ҳамкор вазирлик раҳбарларининг буйруқлари ўқиб эшиттирилган ҳолда тизимда фидокорона хизмат олиб бораётган бир гуруҳ ҳарбий хизматчи ва ходимлар ҳамда уларнинг оила аъзолари муносиб тақдирландилар.
Тадбир концерт дастурларига уланиб кетди ва барчага бирдек байрамона кайфият улашди.
