Миллий гвардия Хотин-қизлар жамоатчилик кенгаши сектор раҳбарлари томонидан вилоятларда маънавий-маърифий тадбирлар ўтказилмоқда
Миллий гвардия Хотин-қизлар жамоатчилик кенгаши сектор раҳбарлари томонидан кенгашнинг Сирдарё, Жиззах, Андижон, Наманган ва Фарғона вилоятларидаги вакиллари ҳамроҳлигида аёл ходимлар ва ҳарбий хизматчилар ҳамда ҳарбийларнинг оила аъзолари билан хизмат ва кундалик ҳаётда юзага келадиган масалалар бўйича сайёр қабуллар ўтказилди.
Шунингдек, ташриф доирасида турли мавзуларда учрашувлар ташкил этилиб, ҳар бир иштирокчи билан якка тарзда суҳбатлар ўтказилди ҳамда депрессия ва стресс ҳолатларининг олдини олиш бўйича психологик тренинглар ташкил этилди.
Шу билан бирга, тизимда хизмат қилаётган аёл ходимлар ва ҳарбий хизматчиларнинг билим ва кўникмаларини синовдан ўтказиш, улар ўртасида соғлом рақобат муҳитини яратиш мақсадида, Заковат интеллектуал ўйинлари ҳам ўтказилди.
Ташриф давомида мазкур вилоятларда ташкил этилган Оилавий болалар уйларига ҳам ташриф уюштирилиб, яратилган шарт-шароитлар, она-она ва фарзанд муносабатлари ҳамда оилавий муҳит ўрганилди. Шунингдек, оромгоҳларда дам олаётган болажонлар ҳолидан хабар олиниб, уларга эсдалик совғалари улашилди.
Бундан ташқари, Марғилон шаҳридаги Ҳунармандлар марказида ташкил этилган “Хон атлас” фестивалига ҳам борилиб, урф-одат ва анъаналар, эстетик қарашлар ва миллий хусусиятларни мужассам этган миллий либослар намойишида иштирок этилди.
Шунингдек, Фарғона вилоятидаги ҳарбий госпиталда Республика ҳарбий прокуратураси билан ҳамкорликда аёл ходимлар ва ҳарбий хизматчилар учун чуқурлаштирилган тиббий кўрик ташкил этилди.
Бундай тадбирларни кўзда тутган ташрифлар республика миқёсида давом эттирилади.
