Миллий гвардия Маънавият ва маърифат марказида ҳамда ҳудудий бошқармаларда "Бурч, Садоқат, Жасорат" шиори остида янги 2023-2024 ўқув йилига бағишланган маънавият дарси бўлиб ўтди.
Мазкур машғулот ҳарбий хизматчи ва ходимлар иштирокида ўтказилиб, унда дунё ва минтақадаги ҳарбий-сиёсий вазият, ҳарбий интизом, ҳарбий хизматчилар ўртасидаги ўзаро муносабатларни мустаҳкамлаш, ҳарбий техника ва қурол-аслаҳалар билан муомалада бўлганда хавфсизлик талабларига риоя этиш борасида маърузалар тингланди. Шунингдек, Ўзбекистон Республикаси Қуролли Кучларида олиб борилаётган ислоҳотлар ва янгиланишлар тўғрисида алоҳида тўхталиб ўтилди. Тадбир сўнггида янги ўқув йили мавсумида барча бўлинмалардан ўз хизмат мажбуриятларига ва қилган қасамёдларига содиқ қолган ҳолда, фуқароларимизни тинчлиги ва хавфсизлигини таъминлашларига, шу билан бир қаторда, ўтказилаётган мусобақаларда фаол иштирок этиб, юқори марраларни эгаллашларига ишонч билдирилди.
Маълумот учун: 2023-2024 ўқув йилида маънавий-маърифий тайёргарлик олдида турган асосий вазифалар сифатида ҳарбий хизматчиларни Ўзбекистон халқи ва Президентига садоқат руҳида тарбиялаш, интеллектуал салоҳият, маънавий бойлик ва ахлоқий покликни ўзида мужассам этган баркамол шахсни шаклантириш; миллий хавфсизлик, ҳарбий қурилиш ва Қуролли Кучларни ислоҳ қилиш соҳасида олиб борилаётган ишлар, тегишли қонунлар, меъёрий ҳуқуқий ҳужжатлар ва Ўзбекистон Республикаси Президенти, Қуролли Кучлар Олий Бош Қўмондони Ш.M.Мирзиёэв баён этаётган давлат сиёсатининг мазмун-моҳиятини тушунтириб бориш; ҳарбий хизматчиларда миллий ўзликни англаш туйғусини ривожлантириб, уларни миллий руҳда тарбиялаш; жаҳонда рўй бераётган жараёнлардан хабардор қилиш белгиланган.
