Миллий гвардия тизимида “Энг илғор саф тайёргарлиги бўлинмаси” кўрик танловининг республика босқичи бўлиб ўтмоқда.
Миллий гвардия тизимида шахсий таркибнинг амалий кўникмаларини мустаҳкамлаш, соғлом рақобат муҳитини шакллантириш ва ҳарбий тайёргарлик даражасини янада ошириш мақсадида “Саф тайёргарлиги бўйича энг илғор бўлинма” кўрик-танлови ташкил этилди.
Жамоат хавфсизлиги университети саф майдонида мазкур кўрик-танловнинг тантанали очилишига бағишланган тадбир бўлиб ўтди.
Унда Миллий гвардия қўмондонлиги, гвардиячилар ва курсантлар иштирок этди.
Тадбирда сўз олганлар бу танлов орқали шахсий таркиб ўртасида соғлом рақобат муҳитини ривожлантириш, бирдамлик ва жамоавий ҳаракатларни мустаҳкамлаш, шунингдек, ҳар бир хизматчининг ўз бурчига бўлган масъулиятини ошириш мақсад қилинганлиги, айниқса, “Жасорат мактаблари” ўқувчиларининг иштирок этиши юртимизда ватанпарварлик тарбияси, ҳарбий соҳага қизиқишни ошириш, келажак авлоднинг юксак маънавий салоҳиятини шакллантиришда муҳим қадам ҳисобланишини таъкидлади.
Шундан сўнг, шахсий таркиб жанговар чақириқ ва тантанали марш билан ўз тайёргарлигини намойиш қилиб, ҳар бир бўлинма ўз саф қўшиқлари ҳамда қурол билан кўргазмали чиқишларини намойиш қилди.
Мазкур танлов Қуролли Кучлар Саф низоми талаблари ижросини таъминлаш, қурол билан махсус саф машқларини аъло даражада бажариш, шахсий таркиб ўртасида ўзаро тажриба алмашиш ҳамда “Жасорат мактаблари” ўқувчиларида ҳарбий соҳага бўлган қизиқишини янада ошириш каби муҳим мақсадларга хизмат қилади.
