Янгиликлар

Миллий гвардиянинг Халқаро ҳамкорлик бошқармаси томонидан ҳарбий хизматчиларни илғор хорижий тажриба асосида малакасини янада ошириш мақсадида доимий равишда тадбирлар ташкил этиб келинмоқда.

Жумладан, жорий йилнинг 15-17 март кунлари Ўзбекистон Республикаси Миллий гвардиясининг бир гуруҳ ҳарбий хизматчилари Буюк Британия мутахассислари томонидан ташкил этилган “Инқирозни бошқариш” мавзусидаги халқаро онлайн курсда иштирок этдилар.

Мазкур онлайн ўқув курс табиий ва техноген тусдаги фавқулодда вазиятларни бошқаришни режалаштириш борасида ўзаро тажриба алмашиш мақсадида Буюк Британия ва Шимолий Ирландия Бирлашган Қироллик Ҳукумати ҳузуридаги Фавқулодда вазиятларни режалаштириш коллежи (Emergency Planning College) мутахассислари томонидан инглиз тилида олиб борилди.

Жонли мулоқот тарзида бўлиб ўтган курсда иштирокчилар табиий
ва техноген тусдаги фавқулодда вазиятларни бошқаришни режалаштириш, хавф-хатарни тўғри баҳолаш, потенциал хавфнинг юзага келишида аҳолини хабардор қилиш юзасидан Буюк Британиянинг тажрибаси билан атрофлича танишдилар.

Шунингдек, тадбир давомида томонлар фавқулодда вазиятларни режалаштириш ва инқирозга қарши курашиш масалалари бўйича ўзларини қизиқтирган саволга жавоб олишди.

Тадбир якунида хавфсизликни таъминлаш масалаларида Буюк Британиянинг тажрибасини ўрганиш бўйича ҳамкорликдаги тадбирларни ташкил этишни давом эттиришга келишиб олинди.