Миллий гвардия ҳарбий хизматчисининг фаолияти, ёшлар билан олиб борилаётган ишлар, спорт ва “Меҳрибонлик” уйлари тарбияланувчилари тақдиридаги иштирок тўғрисида
Бугун, “Тошкент Ёшлар форуми – 2021” тадбирларининг иккинчи кунида Ўзбекистон Республикаси Миллий гвардияси, Қўриқлаш бош бошқармаси, шунингдек Тошкент шаҳар ИИББ раҳбарияти ёш йигит ва қизлар билан очиқ мулоқот ўтказишди.
Миллий гвардия қўмондонининг ўринбосари полковник Сарвар Мамаюсупов ёшларга нутқ билан мурожаат қилди. Гвардия фаолиятининг мақсад ва вазифаларини белгилаб берувчи ҳуқуқий асослар тўғрисида қисқача маълумот берилгач, бугунги кун ёшларини қизиқтирадиган масалалар муҳокамасига ўтилди.
Кўпчилик гвардия фаолияти тўғрисида маълумотга эга эканлиги маълум бўлди. Айниқса, етим ва ота-онасининг қарамоғисиз қолган болаларни тубдан янгиланган тарбиялаш тизимини жорий қилиш ишларига бағишланган мавзу энг кўп муҳокама қилинган мавзулардан бири бўлди. Ёшлар оилавий болалар уйини ташкил қилиш ишлари, “Меҳрибонлик” уйи ва бошқа ёпиқ ўқув-тарбия муассасаларининг тарбияланувчиларининг янги оилаларга мослашувлари, болалар уйлари тарбияланувчилари қанчалик сифатли уйлар билан таъминланаётганлари тўғрисида қизиқдилар.
Гвардия раҳбарияти вакиллари – Тарбиявий ишлар бошқармаси бошлиғи подполковник Нуриддин Мирзаев ва Қўриқлаш бош бошқармаси бошлиғининг ўринбосари полковник Зафаржон Буроновлар хизматга кириш, ихтисослаштирилган ўқув муассасалари, Миллий гвардиянинг турли спорт турларининг ривожига қўшаётган ҳиссасига доир берилган кўплаб саволларга жавоб бердилар. Ёшлар машҳур спортчилар – Миллий гвардия ҳарбий хизматчилари тўғрисида, уларнинг спорт ва хизматни бирга олиб боришлари ҳақида қизиқдилар.
Учрашув якунида ёш йигит ва қизлар Миллий гвардия вакилларига савол-жавоблар ҳамда очиқлик учун миннатдорчилик билдириб, очиқ мулоқот тарзидаги бу каби учрашувлар давом этишидан умидвор эканликларини айтишди.
