Мамлакатимизда жорий қилинган янги тизимга асосан “Етим болалар ва ота-она қарамоғидан маҳрум бўлган болаларни давлат томонидан қўллаб-қувватланишида бугунги кунга келиб мутлақо янги методикалар ишлаб чиқилди ва давлатимиз раҳбарининг 2021 йил 09 август кунидаги “Етим болалар ва ота-она қарамоғидан маҳрум бўлган болаларни тарбиялашнинг янгиланган тизимини жорий этиш чора-тадбирлари тўғрисида”ги  Қарори қабул қилинди.

Унга асосан болаларнинг оилавий шароитга хос тарбия олишлари, уларни фан, IT, хорижий тиллар, касб-ҳунар ва тадбиркорликка ўқитиш, спорт билан шуғулланишларини ташкил этиш  борасида жойлардаги ҳокимликлар, Ҳалқ таълими, Миллий гвардия ва бошқа ҳамкор вазирликлар билан биргаликдаги тизимли ишлари йўлга қўйилди.

Мазкур йўналишдаги ишларнинг Самарқанд шаҳрида жойлашган  Меҳрибонлик уйида қай даражада амалга оширилаётганлиги ва тарбияланувчилар учун яратилган шарт-шароитлар билан яқиндан танишиш мақсадида Миллий гвардия қўмондони Р.Джураев, вилоят прокурори Р.Машарипов ва вилоят ҳалқ таълими бошқармаси бошлиғи З.Шодиевалар мазкур муассасага ташриф буюриб, ушбу Меҳрибонлик уйи директори  М.Фахриддинова бошчилигидаги жамоанинг тарбиячи ҳамда психолог ходимлари билан учрашуви бўлиб ўтди. Қисқа вақт мобайнида амалга оширлган ишлар натижасида ушбу Меҳрибонлик уйи тарбияланувчиларининг 17 нафари ўз ота-онаси бағрига кайтарилгани, 4 нафари   фарзандликка олингани ва 2 та оила беш нафардан 10 та ўғил-қизни  оила аъзоси сифатида қабул қилганликлари ёдга олинди.

Учрашув давомида Миллий гвардия қўмондони, юртбошимиз ташаббуси билан жорий қилинган ушбу янги тизимдан кўзланган асосий мақсад ва бу йўналишда белгилаб берилган вазифаларнинг мазмун моҳиятига алоҳида тўхталиб ўтиб, болаларни мустақил ҳаётга тайёрлашда тарбиячи ҳамда психологларнинг ўрни ва вазифалари тўғрисида ўз фикрларини билдирди.

Ташриф якунида Миллий гвардия қўмондони, мазкур Меҳрибонлик уйига мурожаат қилиб келган ҳамда шу ердаги болажонлардан 5 нафар ўғил-қизни ўз бағрига олиш истагида бўлган оилани учратиб, улар билан яқиндан сухбатлашди ва ҳалқимизга хос олийжаноблик билан эзгу ишга қўл ураётганликларини қўллаб-қувватлашини айтиб, ўз миннатдорчилигини изҳор этди.

Шунингдек, бу каби меҳридарё фуқароларимизга  ўрнатилган тартибда кўмак берилиши юзасидан тегишлилиги бўйича масъул ходимларга топшириқлар берилди.

Шундан сўнг Миллий гвардия қўмондони, вилоят мутасадди раҳбарлари билан  биргаликда “SOS” Ўзбекистон болалар маҳаллалари уюшмаси Самарқанд шаҳар филиали ва Ёшларга ҳамрохлик қилиш хизмати фаолияти билан танишди. Унда мазкур муассаса раҳбари Д.Давронова билан учрашиб, бу ердаги тарбияланувчи ёшлар учун ҳам жорий қилинган янги тизим доирасидаги чора-тадбирларни кучайтириш зарурлиги, ҳозирда уларнинг билим олишлари ҳамда касбга йўналтириш борасида замон талабларига мос шарт-шароитлар яратилиши ва бунга Миллий гвардия бўлинмалари ҳамкор вазирликларни жалб қилган ҳолда яқиндан ёрдам бериши юзасидан вазифалар белгиланди.