МИЛЛИЙ ГВАРДИЯ ТИЗИМИДА ИЛК БОР “ЎЗБЕК МИЛЛИЙ РАҚСЛАРИНИ ИЖРО ЭТИШ” КЎРИК-ТАНЛОВИ БЎЛИБ ЎТДИ
Жорий йилда Миллий гвардия ҳамда Республика Маънавият ва маърифат маркази ҳамкорлигида илк бор “Ўзбек миллий рақсларини ижро этиш” кўрик-танлови ташкил этилиб, 9-10 апрель кунлари Бухоро шаҳрида республика босқичи бўлиб ўтди.
Кўп асрлик бой маданиятимизнинг ажралмас қисми бўлган миллий рақс санъати орқали ҳарбий хизматчи ва ходимларнинг маънавияти бадиий-эстетик қарашларини юксалтириш, миллий қадриятлар ва анъаналаримизга бўлган ҳурматини ошириш борасида амалга оширилаётган чора-тадбирлар муҳим аҳамият касб этади.
Хусусан, миллий рақс санъати бўйича ҳарбий-хизматчи ва ходимлар орасидан иқтидор эгаларини аниқлаш ва саралаш мақсадида Бухоро шаҳрида ташкил этилган ушбу кўрик-танловда республикамизнинг барча вилоятларидан ташриф буюрган 30 га яқин иштирокчилар қатнашди.
Мазкур тадбир мобайнида, ҳакамлар томонидан ҳарбий хизматчи ва ходимларнинг миллий рақс санъати намуналарининг асл миллий хусусиятларини кўрсата олиши, рақс ижрочиларининг маҳорати, кийиниши ва саҳна маданияти, бадиий ва эстетик бойлиги, шунингдек, ижро этиладиган санъат асарининг бадиий қиймати ҳамда рақснинг ижро этиш услублари ва йўналишларининг мутаносиблиги алоҳида эътиборга олиниб, холис баҳоланди.
Тадбирнинг якуний қисми бўлмиш тақдирлаш маросими Бухоро шаҳридаги "Нодир Девонбеги" мажмуасида тантанали равишда ўтказилди.
Кўрик-танловнинг ғолиблари ташкилотчилар томонидан диплом ва эсдалик совғалар билан муносиб тақдирландилар.
