МИЛЛИЙ ГВАРДИЯ ТИЗИМИДА ИЛК БОР “ЎЗБЕК МИЛЛИЙ МАҚОМ САНЪАТИ” КЎРИК-ТАНЛОВИ БЎЛИБ ЎТМОҚДА
Жорий йилда Миллий гвардия тизимида “Ўзбек миллий мақом санъати” кўрик-танлови ташкил этилиб, 29-30 апрель кунлари Фарғона вилояти Марғилон шаҳрида жойлашган Мусиқали мақом театрида республика босқичи бўлиб ўтмоқда.
Марғилон шаҳрида ташкил этилган ушбу кўрик-танловда республикамизнинг барча вилоятларидан ташриф буюрган 50 га яқин иштирокчилар қатнашмоқда.
Танлов иштирокчилари мақом санъатининг мусиқий мероси бўлган ўзбек мақоми наволари - Шашмақом, Бухоро, Хоразм мақомлари ва Фарғона - Тошкент мақом ижрочилик йўллари туркумлари, воҳавий ва шахсий мақом ижрочилик анъаналари, мусиқий мерос ва улар билан боғлиқ матн, шеър, мусиқа ва ижро йўлидан хабардор бўлиши ва асарларни ёддан ижро қилишлари бўйича беллашадилар.
Мазкур тадбир мобайнида, ҳакамлар томонидан ҳарбий хизматчи ва ходимларнинг чиқишлари, уларнинг ижро этаётган дастурларининг ғоявий юксак бадиийлиги, ижро маҳоратлари, овоз ва созларнинг уйғунлиги, либослари ҳамда саҳна маданияти эътиборга олиниб, холис баҳоланди.
Тадбирнинг якуний қисми бўлмиш тақдирлаш маросими жорий йилнинг 30 апрель куни Фарғона шаҳридаги Санъат саройида тантанали равишда ўтказилиши режалаштирилган.
