Миллий гвардия ходимлари телефон ўғирлашда гумон қилинган шахсни қўлга олишди
Тошкент шаҳридаги Чорсу бозорида 10 февраль, шанба куни соат 14.30 да Миллий гвардия ходимларига бир вақтнинг ўзида икки киши мурожаат қилиб, уяли телефонлари йўқолгани ҳақида хабар беришди. Фуқаро E.O. дан 2 миллион 200 минг сўмлик Redmi 9a, Н. Ж. дан эса 3 миллион 400 минг сўмлик Samsung Galaxy A05s ўғирланганлиги аниқланди.
Тезкор ҳаракатлар натижасида ходимлар ўғирликда гумон қилинган шахсни қўлга олишди. У 36 ёшли К. И. бўлиб чиқди. Шахсий текширув давомида гумонланувчининг устки кийимининг чўнтагида жабрланувчилар маълум қилган русумли иккита уяли телефони топилди.
Қўлга олинган шахс ички ишлар органларининг таянч пунктига олиб борилди, жабрланувчилар K.I. дан олиб қўйилган телефонларда ўзлариникини таниб олишди. K.I. телефонларни ўғирлаганини тан олди.
Ҳозирда Шайхонтоҳур тумани ИИО ФМБ ходимлари томонидан суруштирув ишлари олиб борилмоқда.
