МОСКВА ШАҲРИДА БЎЛИБ ЎТГАН “ЕВРООСИЁ ЖАҲОН КУБОГИ ЛИГАСИ” МУСОБАҚАЛАРИДА МИЛЛИЙ ЖАМОАМИЗНИНГ МОҲИР ЧАВАНДОЗЛАРИ ҒАЛАБАНИ ҚЎЛГА КИРИТИШДИ
Жорий йилнинг 28-31 октябрь кунлари Москва шаҳрида от спортининг тўсиқлардан сакраш тури бўйича бўлиб ўтган “ЕвроОсиё жахон кубоги лигаси” мусобақалари бўлиб ўтди. Мазкур мусобақада Ўзбекистон Миллий терма жамоаси спортчи чавандозлари муносиб иштирок этиб, “Тўсиқларнинг баландлиги 155 см” бўлган йўналишдаги финал босқичида Бекзод Қурбонов “Кинг Корнет-Л” лақабли отида юқори натижа кўрсатиб 1-ўринни, “Тўсиқларнинг баландлиги 150 см” бўлган йўналишда эса Умиджон Камилов “Номеро Уно Рафаел” лақабли отида фахрли 1-ўринни қўлга киритдилар. Шунингдек, “Етти ёшгача бўлган отлар” ўртасидаги беллашувда Аъзам Толиббаев “Роксибаджо” лақабли оти билан 1-ўринни ва “Болалар ўртасида”ги баҳсларда ҳам Бобуржон Валижонов “Леди” лақабли оти билан
1-ўринга лойиқ деб топилдилар. Миллий терма жамоа спортчи чавандозларимиз ўзларининг олдиларига қўйган олий мақсадлари сари юқори марраларга интилган ҳолда Ватанимиз шаънини муносиб ҳимоя қилиб, юртимиз байроғини юксакларга кўтаришди.
Эслатиб ўтамиз Миллий терма жамоамиз таркибида бўлган Умид Комилов, Аъзам Толиббаев ва Бобуржон Валижоновлар Миллий гвардия от спорти бўйича республика олий спорт маҳорати мактаби спортчи чавандозлари ҳисобланишади.
2 ноябрь куни ушбу спортчи чавандозларимиз ва мураббийлар ёруғ юз билан юртимизга қайтиб келишди ва улар “И. Каримов” номидаги халқаро аэропортда муносиб кутиб олинди.
Миллий гвардия қўмондонлиги ва шахсий таркиби номидан Ўзбекистон йилқичилик ва от спорти федерацияси жамоасига ўз миннатдорчилигимизни билдириб, спортчи чавандозларимизнинг халқаро ареналардаги навбатдаги ғалабаси билан самимий муборакбод этамиз.
