МОСКВАДА ОТ СПОРТИНИНГ ТЎСИҚЛАРДАН САКРАШ БЎЙИЧА ЕВРОПА ЛИГАСИ КУБОГИНИНГ 4 БОСҚИЧИ ЯКУНЛАНДИ
Жорий йилнинг 4-8 август кунлари Россия Федерациясининг Москва шаҳрида бўлиб ўтган От спорти бўйича Халқаро мусобақада Ўзбекистон терма жамоаси таркибида Миллий гвардия от спорти бўйича республика олий спорт маҳорати мактаби спортчи чавандозлари иштирок этишди.
Мазкур мусобақада 11 та давлат улар, Ўзбекистон, Россия, Арманистон, Қирғизистон, Туркманистон, Қозоғистон, Беларусь, Молдавия, Озарбайжон, Эрон ҳамда Грузиянинг етакчи спортчилари ўртасида уч босқичдан иборат муросасиз беллашувлар бўлиб ўтди.
Якуний натижаларга кўра:
Ўзбекистон жамоаси 1-ўрин;
Қирғизистон жамоаси 2-ўрин;
Россия жамоаси 3-ўрин;
Қозоғистон жамоаси 4-ўрин;
Беларусь жамоаси 5-ўрин.
Спортчиларимиз икки йўналишда: якка тартибда ва жамоавий баҳсларда қатнашиб, тўсиқлардан сакраш ва от йўрттириш бўйича 12 та олтин, 18 та кумуш ва 13 та бронза медалларини қўлга киритишди. 17 июндан 25 июлгача бўлган натижаларга кўра, Ўзбекистон терма жамоаси 43 та медални қўлга киритди.
Миллий гвардия от спорти бўйича республика олий спорт маҳорати мактаби спортчи чавандозлари Зокиржон Тўражонов 120 см, Саидамирхон Турғунбоев 130 см ва Умиджон Камиловлар баландлиги 140-150 см бўлган йўналишда 1-ўринни қўлга киритишди. Шунингдек, Бахромжон Газиев, Умиджон Камилов, Оқилжон Собиржонов ва Азам Толиббоевлар ушбу нуфузли мусобақанинг сўзсиз етакчиларига айланиб 2021 йилнинг сентябрь ойида Испания пойтахти Барселона шаҳрида бўлиб ўтадиган Халқаро мусобақанинг финал йўлланмасини қўлга киритдилар.
Миллий гвардия қўмондонлиги ва барча шахсий таркиби номидан спортчиларимизнинг ушбу ғалабаси билан самимий муборакбод этиб, кейинги мусобақаларда улкан зафарлар тилаймиз!
