Жорий йилнинг 6 декабрь куни Маҳалла ва оилани қўллаб-қувватлаш вазирлиги биносида видео-селектор тарзидаги кенгайтирилган йиғилиш бўлиб ўтди.

Мазкур йиғилиш Маҳалла ва оилани қўллаб-қувватлаш вазири Р.Маматов раислигида ўтказилиб, унда Миллий гвардия қўмондони Р.Джураев ва Самарқанд шаҳридан Ўзбекистон Ёшлар ишлари агентлиги директори А.Саъдуллаев, шунингдек шаҳар ва вилоят ҳокимларининг ёшлар билан ишлаш бўйича ўринбосарлари, Қорақалпоғистон Республикаси маҳалла ва оилани қўллаб-қувватлаш вазири, вилоятлар ва Тошкент шаҳар бошқармалари бошлиқлари ва уларнинг ўринбосарлари, Фуқаролар йиғинлари раислари ҳамда бошқа ҳамкор вазирликларнинг масъул ходимлари иштирок этишди.

Йиғилишда Миллий гвардия  қўмондони Р.Джураев сўзга чиқиб,  барча иштирокчилар эътиборини Етим болалар ва ота-она қарамоғидан маҳрум бўлган болаларни давлат томонидан қўллаб-қувватлашнинг янгиланган тизимини жорий этишга қаратилган чора-тадбирларнинг ҳамкорликдаги ижроси юзасидаги  масалаларга қаратди.  

Маъруза давомида, давлатимиз раҳбарининг “Етим болалар ва ота-она қарамоғидан маҳрум бўлган болалар”ни давлат томонидан қўллаб-қувватлаш тизимини такомиллаштиришга қаратилган Фармон ва Қарорлари асосида Миллий гвардия ва тегишли вазирликларга аниқ вазифалар белгилаб берилганлиги таъкидланиб,  шу қисқа давр мобайнида ҳамкорликда амалга оширилган ишлар самарасида эришилган натижалар ёдга олинди.

Шу қаторда Меҳрибонлик болалар муассасалари билан ишлаш жараёнида дуч келинган тизимдаги қатор камчилик ва муаммолар санаб ўтилди. Хусусан,  Меҳрибонлик уйига топширилган аксарият болаларнинг яқин қариндошлари бўла туриб  уларнинг “қарамоғига берилган болаларни тарбиялаш ва уларни вояга етказиш масъулиятини зиммаларига олмаганликлари” туфайли улар меҳрибонлик уйига топширилганлиги ҳамда шу каби маҳаллада ечимини топиш мумкин бўлган қатор муаммоли масалларга мисоллар келтирилиб, маҳалла раиси ҳамда фаолларининг масъулиятига танқидий фикрлар билдирилди.  

Меҳрибонлик уйларидан чиққан ёшлар яна маҳаллага келиб яшашларини инобатга олган ҳолда, тегишли давлат ташкилотлари ва “маҳалла” томонидан уларнинг аниқ рўйхати юритилиши, уларнинг ҳаётда ўз ўринларини топишларига шарт-шароитлар яратилиши ва ҳар томонлама ёрдам кўрсатилиши, бунда – айнан маҳалланинг ўрни ва роли  муҳим  аҳамият касб этиши таъкидланди.

Ўз навбатида Маҳалла ва оилани қўллаб-қувватлаш вазири Р.Маматов  ҳамда Ўзбекистон Ёшлар ишлари агентлиги директори А.Саъдуллаевлар Миллий гвардия қўмондонининг танқидий фикрларини қўллаб-қувватлаган ҳолда келгусидаги ҳамкорликда амалга ошириладиган масалаларга тўхталиб ўтдилар. 

Шунингдек, барча давлат идоралари бир ёқадан бош чиқариб, ҳамкорликда мавжуд куч ва воситаларни, билим-салоҳиятини тўғри йўналтириб, Юртбошимиз томонидан ушбу йўналишда белгилаб берилган аниқ ва мақсадли вазифаларни юқори савияда бажарилишига ишонч билдирилди.