МУАММОЛАР ЖОЙИДА ҲАЛ ЭТИЛМОҚДА
Очиқ мулоқот, мурожаатларни жойида ўрганиш муаммоларни ижобий ҳал этишнинг асоси бўлиб хизмат қилади. Шу муносабат билан Наманган вилоятида Миллий гвардия қўмондони ўринбосари полковник С.Мамаюсупов вилоят ҳокимлиги, Маҳалла ва оилани қўллаб-қувватлаш бошқармаси мутасадди раҳбарлари ҳамда кенг жамоатчилик иштирокида ҳарбий хизматчи ва ходимларнинг оила аъзолари билан сайёр қабул ўтказди. Суҳбат давомида ҳар бир мурожаат ўрганилиб, аниқланган камчилик ва муаммоларни ҳал этиш бўйича масъул раҳбарларга тегишли вазифалар юклатилди.
Шунингдек, аҳоли турмуш тарзи билан яқиндан танишиш ва ўқувчи ёшларга яратилаётган шароитларни ўрганиш мақсадида Миллий гвардияга бириктирилган маҳаллалар ва мактабларга ташриф уюштирилди. Хусусан, Давлатобод туманидаги 58-сонли умумтаълим мактаби ўқувчилари билан юзма-юз ўтказилган мулоқот чоғида ёшларнинг қизиқишлари ва уларга берилаётган таълим сифатига катта эътибор қаратилди.
Таъкидлаш жоизки, Миллий гвардия тизимида хизмат олиб бораётган ва олиб борган ҳар бир ҳарбий хизматчи ва унинг оила аъзолари ижтимоий ҳимояланган. Навбатдаги манзилга ташриф ҳам юқоридаги фикримиз исботидир. Ёшлар билан учрашувдан сўнг қўмондон ўринбосари хизмат бурчини бажариш чоғида жасорат кўрсатган Наманган вилояти Қўриқлаш бошқармаси ходими марҳум А. Абдулвохидов хонадони вакиллари, оила аъзолари ҳолидан хабар олиб, фидоий ходимнинг жасоратини ёдга олди. Оила аъзоларининг турмуш тарзи ўрганилиб, мавжуд камчиликларни бартараф этиш масалалари назоратга олинди.
Албатта, бу каби очиқ мулоқотлар нафақат муаммоларнинг ечилишига, балки янги ғоя ва таклифларни ҳаётга татбиқ этиб, кўплаб ижобий чора-тадбирларнинг амалда бажарилишига сабаб бўлади.
