Миллий гвардия тизимида муддатли ҳарбий хизматни ўташ учун етиб келган ёш аскарларнинг руҳий ҳолати, хулқ-атвори ҳамда ижтимоий психологик даражаларини ўрганиш ҳамда мустаҳкамлаш бўйича психологик тренинглар ўтказилиши давом этмоқда.
Ўтказилган тадбирлар давомида аскарларнинг эмоционал ҳолати ҳамда дунёқарашини ўрганиш,улардаги психологик барқарорликни аниқлаш ва юзага келиши мумкин бўлган муаммоли вазиятлардан чиқиш йўллари бўйича суҳбатлар ташкиллаштирилди.
Шунингдек, келажакдаги мақсадлар ва унга эришиш йўлидаги психологик қатъийлик сирлари ҳақида ҳам тўхталиб ўтилди.
Мазкур суҳбатларнинг асосий мақсади муддатли ҳарбий хизматчиларнинг ҳарбий хизматга психологик тайёргарлигини шакллантириш ва мослашувига таъсир қилувчи стресс омилларни аниқлаш, ҳарбий хизматнинг дастлабки босқичининг ўзига хос хусусиятларини ҳисобга олган ҳолда, уларни психологик тайёрлаш бўлди.
Шу билан бир қаторда, мутахассис психологлар томонидан йигитларнинг жамоа билан ўзаро муносабатлари қай даражада эканлигини ўрганиш мақсадида бир қанча машғулотлар ўтказилди.
Жамоавий тренинглар давомида аскарлар стресс, қўрқув, диққат кўламини бузилиши каби психик жараёнлар юзасидан амалий ҳамда назарий билимларга эга бўлишди.
Шуни алоҳида таъкидлаш жоизки, тренинглар сўнгида муддатли ҳарбий хизматчилар яна бир бор жамоа жипслиги енгилмас куч гарови эканлигига ишонч ҳосил қилишди.
