Наманган вилоятида “Денгиз тулпори” номидаги Чавандозлар мактаби ўз фаолиятини бошлади ва унинг тантанали очилиш маросимига бағишланган “Улоқ Кўпкари”, “От устида пойга” ва “Беш кураш” спорт турлари бўйича мусобақа ўтказилди.
Давлатимиз раҳбарининг 2021 йил 5 августдаги “Чавандозлар мактаблари фаолиятини ташкил этиш чора-тадбирлари тўғрисида”ги Қарорига асосан жорий йилнинг 31 октябрь куни Наманган вилояти Тўрақўрғон туманида “Денгиз тулпори” номидаги Чавандозлар мактаби ўз фаолиятини бошлади. ва унинг тантанали очилиш маросимига бағишланиб, “Улоқ Кўпкари”, “От устида пойга” ва “Беш кураш” спорт турлари бўйича мусобақа ўтказилди.
Мазкур тадбирда Наманган вилояти хокимлиги, Миллий гвардия ва Ички ишлар бошқармалари мутасадди раҳбарлари бошқа ҳамкор вазирлик ҳамда ташкилотлар вакиллари иштирок этишди.
Эътиборлиси шундаки, вилоят ва қўшни республикаларда моҳир чавандоз сифатида ном қозонган Тўрақўрғонлик полвон Алимардон Бозоров от спортини ривожлантиришга бўлган қизиқиши, шижоати ва ташаббускорлиги билан "Денгиз тулпори" чавандозлик мактаби қошида, от спорти майдонини ташкил этилишига ўз ҳиссасини қўшди.
Қарийб 6,5 гектар ер майдонидан иборат бўлган ушбу спорт майдони 2000 отлиқни ўз ичига олиш қувватига эга. Келгусида туризм салоҳиятини ошириш учун мазкур муассаса қошида меҳмонхона, дам олиш сиҳатгоҳи, даволаниш клиникасини ҳам барпо этиш йўлга қўйилиши режалаштирилган.
Ушбу майдоннинг очилиш маросими туманда катта спорт байрамига айланиб кетди. Улоқ-кўпкари мусобақасида қатнашиш учун Қирғизистон, Қозоғистон республикалари, Фарғонанинг Қўқон, Марғилон шаҳарлари, Чуст, Наманган, Уйчи, Чортоқ, Янгиқўрғон туманларидан жами 520 нафардан зиёд чавандозлар ташриф буюришди.
Тадбирда вилоят ҳокими Ш.Абдураззоқов сўзга чиқиб, ўзида миллий халқ ўйинларини мужассам этган от спорти мамлакатимизда тобора ривож топаётгани, мазкур иншоот давлатимиз раҳбари Қарорлари ижроси юзасидан вилоятимизда илк бор ташкил гаплашаётганлиги муҳим аҳамият касб этишини таъкидлаб ўтди. Шунингдек, вилоят ҳокимлиги номидан ушбу тадбирда иштирок этаётган, спортчилар Жаҳон чемпионлари Рустамжон Умаров ва Азамат Лутфуллаевларга той совға қилди.
Спорт байрами “Кўк бўри”, “От устида кураш” ўйинлари билан бошланиб, Улоқ кўпкарига навбат берилди. Унда вилоят ҳокимининг махсус совринлари, ҳомий ва ташкилотчиларнинг қимматбаҳо совғалари ғолибларга топширилди.
Мусобақа кенг кўламда ўтказилиб, бунда барча туман от спорти секциялари, мактаб ўқувчилари, ҳаваскор ва уюшмаган ёшлар ҳамда фахрий чавандозлар иштирок этдилар.
