Сўнгги 24 соат ичида Миллий гвардия ҳарбий хизматчилари ички ишлар ходимлари билан биргаликда жамоат жойларида 40 дан ортиқ маъмурий ҳуқуқбузарликларни аниқлади.
Шу билан бирга, жамоат жойларида алкогол маҳсулотлари истеъмоли билан боғлиқ 31 та ҳолат қайд этилди.
Жумладвн, пойтахтнинг Қуйлиқ бозорида 50 ёшли Б.А. спиртли ичимлик истеъмол қилгани учун сайёр суд томонидан 10 сутка маъмурий қамоқ жазоси тайинланди.
Шунингдек, Ўзбекистон Республикаси Маъмурий жавобгарлик тўғрисидаги кодексининг 183-моддаси (“Майда безорилик”) билан 4 та баённома расмийлаштирилди.
Хусусан, Фарғона шаҳридаги “Ал-Фарғоний” истироҳат боғида 36 ёшли С.Х. ўз танишлари билан жанжал чиқариб, атрофдагиларнинг тинчлантиришга қилган ҳаракатларини эътиборсиз қолдиради. Натижада ушбу ҳолат юзасидан Миллий гвардиянинг Фарғона вилояти бўйича бошқармаси ҳарбий хизматчилари томонидан баённома тузилиб, материаллар судга тақдим этилди.
Бундан ташқари, кечаси фуқаролар тинчлигини бузаётган шахсларга нисбатан тегишли чоралар белгиланмоқда.
Жумладан, пойтахтнинг Олмазор тумани Фаробий кўчасида ўз автомашинасида мусиқани баланд овозда эшитган 20 ёшли Х.Н. га нисбатан Маъмурий жавобгарлик тўғрисидаги кодексининг 192-моддаси (“Маиший шовқинга қарши кураш талабларини бузиш”) билан ҳуқуқбузарлик содир этганлиги ҳақида баённома тузилди.
Таъкиллаш жоизки, қонун ва тартибни бузувчилар ҳар доим ҳам Миллий гвардия ходимларининг огоҳлантиришларига етарлича муносабат билдирмай, ҳуқуқбузарликни тўхтатиш ҳақидаги  талабларини бажармаяптилар. Масалан, ўтган кун давомида Ўзбекистон Республикаси Маъмурий жавобгарлик тўғрисидаги кодекснинг 194-1-моддаси (“Ўзбекистон Республикаси Миллий гвардияси ҳарбий хизматчиси (ходими)нинг қонуний талабларига риоя қилмаслик”) билан иккита баённома тузилди.
Яна бир ҳолатда Андижон шаҳрида 19 ёшли М.З спорт мажмуасига ташриф буюрувчилар билан тортишиб, уни тартибга чақирган Миллий гвардиянинг Андижон вилояти бўйича бошқармаси ҳарбий хизматчиларига қаршилик кўрсатган.
Гулистон шаҳри, “Юрт байроғи” майдонида 19 ёшли Н.Н. ўзини ноўрин тутиб, хулқ-атвор қоидаларига эътибор бермай, посбонларнинг ҳуқуқбузарликни тўхтатиш бўйича талабларига бўйсунмаган.
Натижада уларга нисбатан Маъмурий жавобгарлик тўғрисидаги кодекснинг 194-1-моддаси билан баённома тузилиб, иккала иш бўйича материаллар судларга тақдим этилди.