Навоий ва Жиззах вилоятларида ноқонуний пиротехника воситалари савдосига чек қўйилди.
Навоий вилоятида Миллий гвардия ходимлари томонидан пиротехника буюмларининг қонунга хилоф муомаласи билан боғлиқ ҳуқуқбузарликлар аниқланди. Олинган хабарга кўра амалга оширилган тезкор ҳаракатлар давомида Навоий шаҳар И.Каримов кўчаси автомобиллар учун мўлжалланган тураргоҳда, Ю. Н. исмли шахс ўзига тегишли бўлган автотранспорт воситасида 24 блок (жами 240 қути) 13 200 дона “ТРЕНИЯ” ёзувли пиротехника буюмларини сотиш мақсадида келган вақтда қўлга олиниб, ашёвий далиллар холислар иштирокида белгиланган тартибда ҳужжатлаштирилди.
Ушбу ҳолат юзасидан ҳозирда масъул ходимлар томонидан суриштирув ишлари олиб борилмоқда.
Шу каби тезкор тадбирлар Жиззах вилоятида ҳам ўтказилиб, Миллий гвардия ходимлари томонидан олинган маълумотга асосан Жиззах шаҳри “Зилол” маҳалласи ҳудудида фуқаро И.А. умумий қиймати 2 700 000 сўмга баҳоланган 150 қути (ҳар бири қутида 55 донадан жами 8250 дона) “Трения” номли пиротехника буюмларини келгусида сотиш мақсадида олиб юрган вақтида ушланган ва ашёвий далиллар холислар иштирокида белгиланган тартибда ҳужжатлаштириб олинган.
Ҳолат юзасидан терговга қадар текширув ишлари амалга оширилмоқда.
