“НАВОИЙ ВА ЁШЛАР”
Ўзбекистон Республикаси Миллий гвардияси Ихтисослаштирилган ўқув марказида шеърият мулкининг султони, ўзбек адабий тилининг асосчиси, давлат арбоби мир Алишер Навоий таваллудининг 581 йиллигига бағишлаб “НАВОИЙ ВА ЁШЛАР” мавзусида маърифий тадбир ўтказилди.
Нафақат миллий адабиётимиз, балки жаҳон адабиётидан ҳам муносиб ўрин эгаллаган буюк ижодкор Мир Алишер Навоийнинг таваллудига бағишлаб ўтказилган тадбирда Ўзбекистонда хизмат кўрсатган артист Меҳмонали Салимов ва Актриса Гулноза Сайидовалар, шунингдек Мирзо Улуғбек, Яшнобод тумани ўқувчи-ёшлари ҳамда Алишер Навоий номидаги ўзбек тили ва адабиёти университети профессор-ўқитувчилари, ҳарбий хизматчи ва ходимлар иштирок этди.
Тадбир аввалида таклиф этилган меҳмонлар сўзга чиқиб, Алишер Навоий ҳаёти ва ижодига яқиндан тўхталар экан, унинг ғазаллари ва рубоийларидан мисралар келтиришди .
Шунингдек, мактаб ўқувчилари ва университет талабалари ўзларининг таёрлаб келган саҳна кўринишлари ва Навоий ғазалларидан ижро этишди. Ижро этилган саҳна кўринишлари, куй-кўшиклар, ғазал ва рубойилар ҳарбий хизматчи ва ёшларга ҳамда меҳмонларга манзур бўлди.
Маросим сўнгида меҳмонлар ва ўқувчи ёшларга эсдалик совғалари ҳамда ташаккурномалар тантанали топширилди.
Шундан сўнг, тадбир муносабати билан ёшлар ўқув маркази фаолияти билан яқиндан танишиш имконига эга бўлишди ва бевосита машғулот жараёнларини кузатишди. Айниқса, саф майдонида Намунали кўргазмали оркестр жамоаси, Фахрий қоровул батальони ҳамда муддатли ҳарбий хизматчилар томонидан намойиш этилган кўргазмали чиқишлар ёшларда жуда катта қизиқиш уйғотди.
