НАВОИЙ ВИЛОЯТИДА “ЁШ ГВАРДИЯЧИ” ҲАРБИЙ-СПОРТ МУСОБАҚАСИ ЎТКАЗИЛДИ
Миллий гвардия тизимига бириктирилган умумтаълим мактабларининг ҳарбий ватанпарварликка ихтисослаштирилган синф ўқувчиларининг билим савиясини мустаҳкамлаш ҳамда ҳарбий спортга қизиқишини янада ошириш мақсадида бир қатор самарали ишлар амалга оширилмоқда.
Хусусан, Миллий Гвардия Навоий вилояти бўйича бошқармаси, Ёшлар иттифоқи вилоят кенгаши ва вилоят Халқ таълими бошқармалари ҳамкорлигида “Ёш гвардиячилар” ҳарбий-спорт мусобақасининг вилоят босқичини ўтказилиши ҳам бу борада олиб борилаётган саъй-ҳаракатларнинг мантиқий давоми бўлди.
Мазкур мусобақада вилоят ҳудудидаги 4 та умумтаълим мактабидан жами 32 нафар иштирокчи 10 та шарт бўйича ўз жамоаси шаънини ҳимоя қилиш мақсадида ғолиблик учун беллашдилар. Ёшлар эпчиллик, зукколик ва жисмоний тайёргарлик борасида нималарга қодир эканликларини исботлаб беришди. Улар томонидан намойиш қилинган кўргазмали чиқишлар томошабинлар ҳамда ҳакамларда яхши таассурот қолдирди.
Мусобақа якунида ҳамкор ташкилотлар томонидан фаол иштирок этган жамоалар ҳамда мусобақа ғолиблари диплом, ташаккурнома ва қимматбаҳо эсдалик совғалари билан тақдирландилар.
