Янги Ўзбекистон тараққиёти йўлида мамлакатимиз тинчлиги ва осойишталигини таъминлашга масъул бўлган Миллий гвардия шахсий таркибининг жанговар ва жисмоний тайёргарлиги замон талабларига мос такомиллаштириб борилмоқда
Ўзбекистон Республикаси Миллий гвардияси тўғрисидаги Қонунида белгиланган асосий вазифалар доирасида Миллий гвардия шахсий таркибнинг жанговар шайлигини юқори даражага кўтариш ва махсус тактик тайёргарлигини замон талабларига мос такомиллаштириб боришга қаратилган чора-тадбирлар давом эттирилмоқда.
Мазкур йўналишдаги ишлар, Миллий гвардия қўмондони генерал-майор Р.Джураев томонидан куни кеча Хоразм вилоятида амалга оширилиб, ҳудудий бошқарма шахсий таркибининг жанговар шайлиги ва жисмоний тайёргарлик даражаси текширилди.
Унда бўлинмаларнинг ўзига хос вазифаларидан келиб чиққан ҳолда гвардиячиларнинг шаҳар шароитидаги ностандарт вазиятларда ишончли ҳаракатлари ҳамда командирларнинг аниқ ва тўғри қарор қабул қилишлари, шунингдек, бошқарув тизимининг замонавий усуллари кўздан кечирилди.
Амалий машғулотлар ҳақиқий ҳолатга яқинлаштирилган тарзда олиб борилиб, гвардиячилар ўзига бириктирилган жанговар қуроллар ва махсус воситалари, шунингдек хизмат итларидан тўғри фойдаланган ҳолда шаҳар шароитида антитеррор ҳаракатлари ва гаровга олинганларни озод қилишда юқори даражадаги тайёргарликларини намоён қилишди. Машғулот мобайнида жароҳат олиш ҳолатлари ҳам кўзда тутилиб, унда ҳар бир гвардиячи ўзига ва сафдошига биринчи тиббий ёрдам кўрсата олиши каби муҳим масалаларга алоҳида эътибор қаратилди.
Тадбир сўнгида қўмондон томонидан ҳар қандай хавф-хатарларни олдини олиш ва бартараф этиш борасида шахсий таркибнинг юқори жанговар ва жисмоний тайёргарлигини таъминлаш, хусусан гвардиячиларнинг "Pekiti Tirsia Kali" жанг санъатини пухта ўзлаштиришлари, дрон ва уларга қарши воситаларни қўллаш усулларига оид вазифалар белгиланиб, мазкур йўналишдаги амалга оширилаётган ишларни жаҳон тажрибаларидан келиб чиққан ҳолда доимий равишда такомиллаштириб борилишига оид тегишлилиги бўйича топшириқлар берилди.
Шу куннинг ўзида, Миллий гвардия қўмондони раислигида ва тизимдаги барча шахсий таркиб иштирокида видеоселектор тарзидаги йиғилиш ўтказилиб, унда тизим фаолиятига доир муҳим вазифалар ва ташкилий масалалар кун тартибидан жой олди.
Хусусан, Миллий гвардия фаолиятига оид 2025 йилга белгилаб олинган муҳим вазифалар ва уларнинг амалий ижроси ҳамда қўмондонлик томонидан манзилли ўрганишлар давомида аниқланган камчиликлар ва ижобий кўрсаткичлар муҳокама қилиниб, вилоятлар кесимида танқидий таҳлил қилинган ҳолда келгусида амалга оширилиши лозим бўлган муҳим вазифалар белгилаб олинди.
