"ОЧИҚ ЭШИКЛАР КУНИ" 200 ДАН ЗИЁД ЁШЛАРНИ БИРЛАШТИРДИ
Эртамиз давомчилари бўлган ёш авлод вакилларининг ҳар томонлама маънан ва жисмонан чуқур ақлий билимга эга бўлишлари учун юртимиздаги барча таълим муассасаларида қулай имкониятлар яратилган бўлиб, ёшларимизнинг ушбу имкониятлардан унумли фойдаланган ҳолда касб танлашда адашмасдан, устозлари берган билимларни пухта ўзлаштиришлари муҳим аҳамият касб этади. Уларни касб танлашга йўналтиришда эса, давлат органларининг ўрни беқиёс.
Таъкидлаш жоизки, кейинги йилларда мамлакатимизда соғлом ҳамда баркамол авлодни тарбиялаш, ёшларнинг интеллектуал салоҳиятини рўёбга чиқариш, йигит-қизларимизни замон талабига жавоб берадиган етук малакали мутахассислар қилиб тайёрлаш борасида кенг кўламли хайрли ишлар амалга оширилмоқда.
Шу мақсадда, жорий йилнинг 16 февраль куни Миллий гвардия Бухоро вилояти бўйича бошқармасида “Очиқ эшиклар куни” ташкил этилди. Унда Бухоро шаҳридаги 200 дан зиёд мактаб ўқувчилари Миллий гвардия ҳарбий хизматчилари билан учрашиб, уларнинг ҳарбий машғулотлари, ҳаёт тарзи билан яқиндан танишдилар. Самимий кечган ўзаро мулоқотлар чоғида ўқувчилар ўзларини қизиқтирган саволларга батафсил жавоб олишди.
Дарҳақиқат, ҳарбий қисмларда мана шундай кўргазмали чиқишлар ҳамда ҳарбий техника ва қурол-яроғларнинг намойиш этилиши ва уларда ёшларнинг иштирок этиши, ўсиб келаётган ёш авлодни Ватан ҳимоясидек шарафли касбга бўлган қизиқиши ортишига, шунингдек она Ватанга муҳаббат туйғуси билан улғайиб, комил инсонлар бўлиб етишишига ўз ҳиссасини қўшиши, шубҳасиз.
Ўзбекистон Республикаси Миллий гвардия Бухоро вилояти бўйича бошқармаси
