Банкоматни ўмармоқчи бўлган шахслар ушланди
Жорий йилнинг 31 мартдан 1 апрелга ўтган кечада тахминан соат 3.00 да 3 нафар номаълум шахслар юзларини тиббий ниқоб билан беркитган ҳолда, “Captiva” русумли автомашинада Самарқанд шаҳар Буюк Ипак Йўли кўчасида ўрнатилган АТБ “Туронбанк” филиалига тегишли бўлган банкомат шаҳобчасига келиб, банкоматни электр қувватидан узишган. Банкоматнинг тармоқдан узилганлиги ҳақида “Қўриқлаш” бўлимига “ташвиш” хабари келиб тушгач, ходимлар дарҳол кўрсатилган манзилга йўл олган. Ташқарида вазиятни кузатаётган ҳуқуқбузарлардан бири хизмат автомашинасининг огоҳлантирувчи товушларини эшитиб, шерикларини огоҳлантирган ва улар ўғирликни охирига етказмасдан, ҳодиса жойидан яширинган. (Маълумот ўрнида:Банкоматда мавжуд бўлган 300 миллион сўмдан ортиқ маблағ ўғирланмаган.)
Самарқанд шаҳар Ички ишлар органлари ходимлари томонидан олиб борилган тезкор-қидирув тадбирлари натижасида фуқаролар 33ёшли А.К, 27 ёшли М.Э ҳамда 27 ёшли Ғ.Ж қўлга олинган ва Captiva автомобили, кийим-кечак, металл буюмлар, шу жумладан таёқлар, арматура, монтаж ва бошқа асбоблар ашёвий далил сифатида расмийлаштирилган.
Юқорида қайд этилган маълумот бўйича Самарқанд Ички ишлар бошқармаси тергов бўлими томонидан Ўзбекистон Республикаси ЖКнинг 25-моддаси ("жиноятга тайёргарлик кўриш ва жиноятга уриниш"), 4-қисми, 169-моддаси "А" банди ("ўғирлик") бўйича жиноят иши қўзғатилди. Тергов ҳаракатлари давом этмоқда.
