ОИЛА СОҒЛОМ ЭКАН, ЖАМИЯТ МУСТАҲКАМ, МАМЛАКАТ БАРҚАРОРДИР
Мамлакатимизда ҳарбий хизматчилар ва уларнинг оила аъзоларини ҳар томонлама ижтимоий ҳимоя қилишга қаратилаётган юксак эътибор тинч, обод ва фаровон ҳаётимизни таъминлашда катта самара бермоқда. Ҳар қандай соҳада жисмонан соғлом ва маънан етук кадрлар билангина юқори самарадорликка эришиш мумкин. Ушбу талаблар Миллий гвардия ҳарбий хизматчилари учун эса алоҳида аҳамият касб этади. Бу каби самарали ишлар Республикамизнинг барча ҳудудларида амалга оширилмоқда. Жумладан, куни кеча Фарғона вилояти Қўқон шаҳрида чуқурлаштирилган тиббий кўрик ташкил этилиб, унда Миллий гвардия ҳарбий хизматчилари ва уларнинг оила аъзолари текширувдан ўтказилиб, саломатликлари назоратга олинди.
Чуқурлаштирилган тиббий кўрик доирасида ҳарбий хизматчи ва уларнинг оила аъзолари болалар шифокори, терапевт ва эндокринолог каби малакали мутахассислар қабулида бўлиб, тегишли маслаҳат ҳамда тавсиялар олдилар. Шунингдек, улар рентген, УТТ, ЭКГ ва бошқа замонавий тиббий ускуналар ёрдамида сифатли кўрикдан ўтказилди.
