ЎҚУВ КУРСЛАРИДА ХИЗМАТ ИТЛАРИ БИЛАН ИШТИРОК ЭТГАН ҲАРБИЙ ХИЗМАТЧИЛАРГА СЕРТИФИКАТЛАР ТОПШИРИЛДИ
Жорий йилнинг 22 февралидан 13 март кунига қадар Миллий гвардия тизимидаги мутахассис кинологлар ва уларга бириктирилган хизмат итлари Ички ишлар вазирлигининг Тошкент шаҳрида жойлашган Махсус тайёргарлик ўқув маркази “Портловчи моддаларни қидириб топиш” йўналиши бўйича малака оширдилар.
Мазкур ўқув курси соҳавий хизматлар билан ҳамкорликда ишлаб чиқилган ўқув дастури асосида ўтказилиб, унда кинолог мутахассисларнинг касб маҳоратларини янада ошириш ва хизмат итларини махсус йўналишларга тайёрлаш мақсадида амалий машғулотлар ташкил этилди.
Машғулотлар якунида ҳарбий хизматчи ва ходимларнинг хизмат итлари билан бирга мазкур йўналишдаги ҳаракатлари, билим ва кўникмалари синовдан ўтказилди. Ўқув курсини муваффақиятли тамомлаган мутахассис кинологларга сертификатлар топширилди.
Малака ошириш курси давомида намуна бўлган жуфтликлар – Самарқанд вилояти бўйича Миллий гвардия бошқармаси ҳарбий қисм мутахассис-кинологи, кичик сержант Р.Аълохонов ўзига бириктирилган “Немо” лақабли хизмат ити билан ҳамда Навоий вилояти бўйича Миллий гвардия бошқармаси ҳарбий қисм мутахассис-кинологи, кичик сержант З.Назаров ўзига бириктирилган “Кони” лақабли хизмат ити билан ўзларининг юқори тайёргарлигини намоён этган ҳолда ўқув курсини аъло баҳоларга якунлаганликлари учун сертификат ва фахрий ёрлиқ билан тақдирландилар.
