ЎҚУВЧИЛАР ИҚТИДОРИНИ НАМОЁН ЭТГАН ТАНЛОВ
Ҳозирда республикамиз бўйлаб барча умумтаълим мактаблари ўқувчи-ёшлари иштирокидаги маънавий-маърифий кечалар ва ижодий учрашувлар бўлиб ўтмоқда. Aйнан шундай тадбирлардан бири Навоий шаҳридаги 16-сонли умумтаълим мактабида Миллий гвардия Навоий вилояти бўйича бошқармаси Хотин-қизлар жамоатчилик кенгаши билан ҳамкорликда “Aёл борки, олам мунаввар” мавзусида ташкил этилди.
Бундан кўзланган асосий мақсад ўқувчиларнинг бўш вақтларини мазмунли ташкил этиш, уларда ўзига бўлган ишончни ва ижтимоий фаоллигини оширишдан иборатдир. Албатта, мазкур тадбир ёшларимизни касбга йўналтириш ва келажакда ўз ўринларини топишга ҳам хизмат қилади.
Мазкур тадбирда 9-синф ўқувчи қизларидан иборат жами 4 та гуруҳ иштирок этди. Унда иштирокчилар ўзларини таништириш, пазандачилик, тезкор-савол жавоб ҳамда ижодий мавзуларда маҳоратларини синаб кўришди. Танлов иштирокчиларининг ҳар бир чиқишлари ҳакамлар ҳайъати томонидан муносиб баҳоланди.
Ватан туйғуси ва она меҳрини мадҳ этувчи шеър ҳамда қўшиқлар ўқувчи-ёшлар қалбида ватанпарварлик ҳиссини янада жўш урдирди.
