Оталиққа олинган ёшлар доимо эътиборимизда
Мамлакатимизда ёшлар масаласида кўплаб хайрли ишлар амалга оширилмоқда. Ёшлар учун муносиб шарт-шароитларни яратиш, таълим сифатини оширишга қаратилган кўплаб чора-тадбирларнинг илгари сурилаётгани ҳамда уларнинг ижроси изчил таъминланаётгани бунга яққол мисолдир. Шунингдек, ёшлар ўртасида ҳуқуқбузарлик ва жиноятларнинг олдини олиш, уларни бандлигини таъминлаш, ижтимоий муаммоларини ҳал этиш борасида сўнгги бир йилда республикамиз миқёсида секторлар кесимида тегишли вазирлик ва идоралар 500 минг нафардан ёшларни оталиққа олишди. Ўзбекистон Республикаси Миллий гвардияси қўмондонлиги ҳам 4-сектордаги 500 минг нафар ёшларни оталиққа олишди. Ҳар бир ёшга офицерлар таркибидан бириктирилиб, уларнинг қизиқишлари ва муаммолари ўрганилди. Куни кеча амалга оширилган ишлар таҳлилига бағишланган видеоселектор ўтказилди. Унда йиғилишни Миллий гвардия қўмондони ўринбосари полковник С.Мамаюсупов олиб борди. Шунингдек видеоселекторда Давлат хавфсизлик хизмати ва Ёшлар ишлари агентлиги масъул вакиллари иштирок этишди. Таҳлилий ва танқидий руҳда ўтказилган йиғилиш давомида ҳар бир ёшга бириктирилган офицер ўз фарзандидек қараши кераклиги таъкидланди. Агар ёшлар жиноят содир этса офицерлар жазоланиши айтиб ўтилди. Ёшлар ишлари агентли ва маҳалла еттилиги билан узвий алоқаларни йўлга қўйиб, ёшлар билан ҳар куни иш олиб бориш ва спорт, маданий маърифий тадбирларни ўтказиш вазифаси қўйилди. Миграциядаги ёшларни ватанга қайтариш масаласига ҳам алоҳида эътибор қаратилди. Шунингдек, 5 нафар ёшларни касбга йўналтириш борасида Жамоат хавфсизлиги университети томонидан Наманган ва Андижон вилоятларида “Ватаннинг содиқ ёшлари” номли ўқув-йиғинлари ўтказилиб, ёшларга ҳарбийлик сир-асрорлари ўргатилмоқда. Видеоселектор якунида ҳарбий хизматчи ва ходимларга олиб борилаётган ишларни янада жадаллаштириш зарурлиги айтиб ўтилди.
