Ўзбекистон Республикаси Миллий гвардияси Ихтисослаштирилган ўқув марказида “Баландлик-ишғол тайёргарлигининг ўзига хос хусусиятлари” мавзусида Республика илмий-амалий конференция бўлиб ўтди
Ўзбекистон Республикаси Қуролли кучлари тизимида баландлик-ишғол тайёргарлигини замонавий, илғор хорижий тажрибаларга асосланиб такомиллаштириш, шунингдек, ҳарбий хизматчиларнинг жанговор хизмати фаолиятида махсус вазифаларни аъло даражада бажаришда кўникма ва малакаларини ошириш мақсадида Ўзбекистон Республикаси Миллий гвардияси Ихтисослаштирилган ўқув марказида “Баландлик-ишғол тайёргарлигининг ўзига хос хусусиятлари” мавзусида Республика илмий-амалий конференция бўлиб ўтди. Унда Ўзбекистон Республикаси Мудофаа вазирлиги, Қуролли кучлар ҳарбий мерос ва замонавий тадқиқотлар институти, ИИВ Академияси, Жамоат хавфсизлиги Университети, ИИВ Қоровул қўшинлари, Қуролли кучлар Академияси, Чирчиқ Олий танк қўмондонлик муҳандислик билим юрти ҳамда Миллий гвардия Тошкент шаҳар бошқармасидан профессор-ўқитувчилар ва мутахассислар иштирок этдилар.
Илмий-амалий конференция давомида ташриф буюрганлар эътиборига маърузачилар томонидан “Махсус вазифаларни бажаришда кўп қаватли биноларда махсус карабинлардан фойдаланиш ва патронли газ гранаталарини қўллаш тартиби”, “Кўп қаватли биноларда жиноятчиларни қўлга олиш вақтида баландлик ишғол гуруҳи қўлланишининг аҳамияти” сингари мавзуларда тақдимотлар ҳавола этилди.
Конференция доирасида иштирокчилар томонидан баландлик-ишғол тайёргарлигини янада такомиллаштириш, шу билан бирга ҳарбий хизматчиларнинг амалий кўникмаларини ошириш бўйича кўплаб таклиф ва мулоҳазалар билдирилди.
