Янгиликлар

Ҳурматли ҳамкасблар!

Миллий гвардия ҳарбий хизматчи ва ходимларини, таълим муассасалари профессор-ўқитувчиларини, курсант ва ўқувчиларини,  соҳа фахрийларини, ишчи-хизматчиларни ҳамда хизмат бурчини бажариш чоғида ҳалок бўлган гвардиячиларимизнинг оила аъзоларини “Ўзбекистон Республикаси Қуролли Кучлари ташкил этилганлигининг 33 йиллиги ҳамда Ватан ҳимоячилари куни” байрами билан самимий табриклайман!

Муҳтарам Президентимиз, Қуролли Кучлар Олий Бош Қўмондони Шавкат Миромонович Мирзиёев “Халқимизнинг хавфсизлиги, тинчлиги ва осойишталигини сақлаш бугун ҳам, келажакда ҳам энг устувор вазифамиз бўлиб қолади”- деб биз ҳарбийларни эътироф этганлар.

Зеро, бу йилги “Ватан ҳимоячилари куни” байрами “Янги Ўзбекистон армияси – мамлакат таянчи, халқимиз фахри!” шиори остида кўтаринки рухда нишонланмоқда.

Дарҳақиқат, Янги Ўзбекистонимизда амалга оширилаётган ислоҳотлар натижасида Миллий гвардия инсон ҳуқуқлари ва манфаатларининг чинакам ҳимоячиси, жамият ва давлат хавфсизлигининг ишончли посбони сифатида чин маънода халқимиз фахрига айланди.

Миллий гвардияда бўлинмаларнинг жанговар ва махсус тайёргарлигига, тизимли равишда замонавий қурол-аслаҳа ва анжомлар, илғор ҳарбий техникалар билан таъминлаб борилишига алоҳида эътибор қаратилмоқда.

Фидойи гвардиячиларимиз Давлатимиз раҳбари томонидан қўйилган вазифаларини бажаришда бор куч-ғайратини сафарбар этиб, мамлакатимизда ўтказилган нуфузли сиёсий тадбирлар, давлат байрамларида хавфсизликни таъминлаш, жамоат тартибини сақлаш, ишончли қўриқловни таъминлаш, ёшларни ҳарбий ватанпарварлик рухида тарбиялаш, улар орасида спортни янада оммалаштириш каби ишларда фаол қатнашиб, олийжаноб Халқимиз ишончини қозонмоқдалар.

Албатта, бундай шарафли хизматимизда бизни қўллаб қувватлаб турган азиз ота-оналаримиз, оила аъзоларимизнинг ўрни беқиёс.

Ҳурматли сафдошлар!

Миллий гвардия шахсий таркибининг камтарона меҳнатлари Давлатимиз раҳбари томонидан эътироф этилиб, куни кеча 9 нафар гвардиячилар “Дўстлик” ордени, “Жасорат”, “Соғлом турмуш”, “Содиқ хизматлари учун”, “Шуҳрат” медаллари билан тақдирландилар.

Бундай ютуқлар Мухтарам Президентимизнинг Миллий гвардияга билдирган юксак ишончларидан далолат бўлиб, бизларни ўз хизмат бурчимизга янада садоқатли бўлишга чорлайди.

Биз бундан кейин ҳам бўлинмаларнинг жанговар шайлигини юқори даражада ушлаб туриш, жамоат тартибини сақлаш, жисмоний ва юридик шахсларни мол-мулкини ишончли қўриқлаш, юксак салоҳиятли ҳарбий кадрларни тайёрлаш ҳамда ёшларни ҳарбий ватанпарварлик руҳида тарбиялаш борасидаги ишларимизни жадаллаштиришимиз.

Шуни ишонч билан айта оламанки, Сизлар, доимо ҳарбий бурчга ва қасамёдга содиқ қолган ҳолда Янги Ўзбекистонимизни ва Халқимизни ҳар қандай таҳдидлардан ишончли ва мардонавор ҳимоя қиласиз.

Сизларни ва оила аъзоларингизни яна бир бор Қуролли Кучлари ташкил этилганлигининг 33 йиллиги ва Ватан ҳимоячилари куни байрами билан самимий табриклайман!

Барчангизга мустаҳкам соғлиқ, оилангизга тинчлик-тотувлик, Ватанни ҳимоя қилишдек шарафли хизматингизда куч-қувват
ва зафарлар тилайман!

Ҳурмат билан! 

Миллий гвардия қўмондони

генерал майор Р.М.Джураев